ەلىمىزدە جاڭا اۋەجاي سالىنباق

فوتو: اشىق دەرەككوز

«SKYHANSA» قازاقستان-گەرمانيا كونسورتسيۋم  جاڭا جۇك-جولاۋشىلار اۋەجايىن سالۋعا نيەتتى, دەپ حابارلايدى  qandastar.kz.

گەرمانيانىڭ فەدەرالدى كانتسلەرى ولاف شولتستىڭ قازاقستانعا رەسمي ساپارى اياسىندا كولىك مينيسترلىگى مەن «SKYHANSA» كومپانياسى اراسىندا «قورعاس – شىعىس قاقپاسى» ارنايى ەكونوميكالىق ايماعىندا جۇك-جولاۋشىلار اۋەجايىن سالۋ جوباسىن ىسكە اسىرۋ تۋرالى نەگىزدەمەلىك كەلىسىم جاسالدى.

قۇجاتقا كولىك ۆيتسە ءمينيسترى تالعات لاستاەۆ جانە “SKYHANSA” باسقارۋشى سەرىكتەسى يۋرگەن گرەتسباح قول قويدى.

«جوبا قۋاتى 500 ادام/ساع دەيىن جولاۋشىلار تەرمينالى بار اۋەجاي ينفراقۇرىلىمىن, سىيىمدىلىعى جىلىنا 550 000 تونناعا دەيىنگى وتىن قويماسىن, جىلىنا 250 000 تونناعا دەيىن جۇكتەردى تولىق وڭدەيتىن جۇك تەرمينالىن سالۋدىڭ, اۋە كەمەلەرىنە قىزمەت كورسەتۋ ءۇشىن اۆياتسيالىق-تەحنيكالىق ورتالىق قۇرۋدىڭ, سونداي-اق باسقا دا تۋريستىك جانە ساۋدا-ويىن-ساۋىق قىزمەتتەرىن دامىتۋدىڭ ءۇش كەزەڭدىك باعدارلاماسىن كوزدەيدى, –  دەلىنگەن قر كولىك مينيسترلىگى بەرگەن حابارلامادا.

جوباعا جەكە ينۆەستيتسيالاردىڭ جالپى سوماسى 300-دەن استام تۇراقتى جۇمىس ورنىن قۇرا وتىرىپ, 500 ملن اقش دوللارىنان باستالادى دەپ بولجانۋدا.

بۇگىنگى تاڭدا جەتىسۋ وبلىسىنىڭ اكىمدىگى اۋەجاي سالۋ ءۇشىن جەر تەلىمىن ءبولدى, ينۆەستور ينۆەستيتسيالار تۋرالى كەلىسىم جاسالعاننان كەيىن جوبانى ىسكە اسىرۋعا كىرىسۋدى جوسپارلاپ وتىر.