جاڭالىقتار
ەلىمىزدە جەمقورلاردان تاركىلەنگەن قارجىعا 28 جاڭا مەكتەپ سالىنادى
فوتو: مينيسترلىك
وقۋ-اعارتۋ مينيسترلىگى ءبىلىم بەرۋ ينفراقۇرىلىمىن قولداۋ قورى ەسەبىنەن 22 مىڭ وقۋشى ورنىنا ارنالعان تاعى 28 جاڭا مەكتەپ سالىناتىنىن مالىمدەدى, دەپ حابارلايدى qandastar.kz
ينفراقۇرىلىمدى دامىتۋ دەپارتامەنتىنىڭ باسقارما باسشىسى جايىق ماحسۋتوۆ مەملەكەت بالالار ءۇشىن قولايلى جاعداي جاساۋعا ەرەكشە كوڭىل ءبولىپ كەلە جاتقانىن اتاپ ءوتتى.
«بۇگىندە 74,4 مىڭ ورىندىق 61 مەكتەپ پايدالانۋعا بەرىلدى, سونىڭ 29-ى ەلدىمەكەندەردە ورنالاسقان», – دەدى جايىق ماحسۋتوۆ.
2024 جىلى 25 مەكتەپ سالىندى, ولاردىڭ باسىم بولىگى استانا قالاسىندا, جانە ماڭعىستاۋ, الماتى, جامبىل وبلىستارىندا ورنالاسقان. بارلىق ءبىلىم بەرۋ ۇيىمدارى زاماناۋي قۇرال-جابدىقتارمەن جابدىقتالعان.
ايتا كەتەيىك, ءبىلىم بەرۋ ينفراقۇرىلىمىن قولداۋ قورىنىڭ ەسەبىنەن 100 مىڭعا جۋىق وقۋشى ورىندىق 89 مەكتەپتىڭ قۇرىلىسى قارجىلاندىرىلدى.
