ەلىمىزدەگى بارلىق عيماراتتىڭ ەنەرگيالىق تيىمدىلىگىنە تەكسەرۋ جۇرگىزىلەدى

ال جىلۋمەن قامتۋ ورتالىقتارى ءجىتى قاداعالانادى. دەلدالدار ماسەلەسى شەشىلەدى. قازىر «جىلۋ ەنەرگەتيكاسى» ءوز الدىنا جەكە سالا بولىپ بەكىتىلدى. ءتيىستى زاڭدى ءماجىلىس دەپۋتاتتارى ەكىنشى وقىلىمدا قابىدادى.

قۇجات سەناتورلاردىڭ قاراۋىنا جىبەرىلىپ وتىر. الميرا ورازباي, ءتىلشى: – ەلىمىزدى 40 گرادۋستىق اياز قىسپاققا العان كەزدە ابدەن توزعان جىلۋ قازاندىقتارىنىڭ شىداس بەرمەي, جۇرتشىلىقتى بۇرسەڭدەتكەنى ءالى كوپتىڭ ەسىندە. وسىنى ەسكەرگەن ماماندار بۇگىنگە دەيىن قاراۋسىز قالعان جىلۋ ەنەرگەتيكاسىن جەكە سالا رەتىندە قولعا الۋدىڭ ۋاقىتى كەلگەنىن ايتادى. سوندىقتان ءماجىلىس وسىعان قاتىستى زاڭدى ماقۇلداپ وتىر.

ونىڭ ماقساتى – جىلۋ ەنەرگەتيكاسىنداعى مەملەكەتتىك باقىلاۋدى كۇشەيتۋ. دۇيسەنباي تۇرعانوۆ, قر پارلامەنتى ءماجىلىسىنىڭ دەپۋتاتى: – جالپى مىنا جىلىتۋ سالاسىنا تۇگەل سول جەردە باپتار قاراستىرىلعان: قالاي, قاي كەزدە, قانداي شارتتارمەن, قانداي مولشەردە, جاۋاپكەرشىلىك, سول جەردە قاراستىرىلعان. ەندى ورتالىقتار مەن جەلىلەردىڭ قىس مەزگىلىنە دايىندىعىن بۇرىنعىداي اكىمدىكتەر ەمەس, ەنەرگەتيكا مينيسترلىگى قاداعالايتىن بولادى.

سونداي-اق ءار نىسان جىلىتۋ ماۋسىمىنا ازىرلىك پاسپورتىن ۋاقىتىندا الماسا, ايىپپۇل تولەيدى. بۇرىن 30 ايلىق ەسەپتىك كورسەتكىش بولسا, جاڭا زاڭعا سايكەس ونىڭ كولەمى 1,5 مىڭ بولماق. يليا روجكوۆ, قر ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتى توراعاسىنىڭ ورىنباسارى: – قازىر ەلەكتر ستانتسيالارىنا قاتىستى ساياساتتى ەنەرگەتيكا مينيسترلىگى, ال قازاندىقتار مەن جىلۋ جەلىلەرى بويىنشا ساياساتتى ونەركاسىپ جانە قۇرىلىس مينيسترلىگى ايقىندايدى. ال وسى زاڭ تولىققاندى قابىلدانعان سوڭ بۇل سالاداعى بارلىق باقىلاۋ ەنەرگەتيكا مينيسترلىگىنە وتەدى. وسىلايشا, اۋداندار مەن قالالارداعى جىلۋمەن قامتۋ ماسەلەلەرىن كەشەندى شەشۋگە مۇمكىندىك بولادى.

ەنەرگيامەن جابدىقتاۋشى ۇيىمدار ەلەكتر ەنەرگياسى نارىعىنىڭ قۇرىلىمىنان شىعارىلادى. وسىلايشا, مەملەكەت دەلدالدار مەن الىپ-ساتۋشىلاردى جويادى. ءسويتىپ, تاريف باعاسى رەتتەلەدى. يليا روجكوۆ, قر ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتى توراعاسىنىڭ ورىنباسارى: – بۇل زاڭ جوباسى, نورماتيۆتىك قۇقىقتىق اكتىلەر تۇرعىسىنان, ءونىمسىز دەلدالداردى جويۋدى كوزدەيدى. مۇنداي قادام, ەڭ الدىمەن مەملەكەت باسشىسىنىڭ تاپسىرماسى ەكەنىن ايتۋىمىز كەرەك. ماسەلەن تاريفتەردە ديففەرەنتسيا بار. قازىر ونى رەتتەۋ جۇمىستارى ءجۇرىپ جاتىر.

سونىڭ اياسىندا ءساۋىر ايىنان باستاپ رەتتەلمەيتىن ەنەرگيامەن جابدىقتاۋشى ۇيىمداردىڭ ليتسەنزيالارى توقتاتىلىپ وتىر. سونداي-اق ولاردىڭ جۇيەلىك قىزمەت كورسەتەتىن «كەگوك» كومپانياسىمەن قاتىناسى اياقتالدى. قازىر ەلىمىزدەگى جىلۋ جانە ەلەكتر جەلىلەرىنىڭ ءبىرشاما پايىزعا توزىعى جەتىپ وتىر. ال جىلۋ قوندىرلىعارىنىڭ ەسكىرۋى 60%-كە اسادى. ءماجىلىس قابىلداعان زاڭ دا وسى ماسەلەلەردى جۇيەلى تۇردە شەشۋگە باعىتتالادى. قازىر قۇجات سەناتورلاردىڭ قاراۋىنا جىبەرىلدى.