جاڭالىقتار
ەلىمىزدەگى كادرعا سۇرانىس 1,6 ملن ادامدى قۇرايدى
بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى جۇمىسپەن قامتۋ دەپارتامەنتىنىڭ ديرەكتورى ازيز يبراگيموۆ ءمالىم ەتتى.
«جۇمىسشىلار قۇرىلىس, اۋىل شارۋاشىلىعى, وڭدەۋ ونەركاسىبى جانە دەنساۋلىق ساقتاۋ سالالارىندا ەڭ كوپ سۇرانىسقا يە», – دەدى ول.
- قۇرىلىس سەكتورىندا ەڭ جوعارى سۇرانىس كەلەسى ماماندىقتارعا كۇتىلۋدە: سىلاقشىلار – 9 758 ادام, قۇرىلىس بريگادالارىنىڭ بريگاديرلەرى – 9 477 ادام, دانەكەرلەۋشىلەر – 7 229 ادام;
- اۋىل شارۋاشىلىعى سالاسىندا: فەرمەرلەر – 10 695 ادام, تراكتورشىلار – 7 141 ادام, مال شارۋاشىلىعى قىزمەتكەرلەرى – 4 940 ادام;
- وڭدەۋ ونەركاسىبىندە: دانەكەرلەۋشىلەر – 3 342 ادام, تىگىنشىلەر مەن كيىمدەردى قالپىنا كەلتىرۋشىلەر – 2 606 ادام, ونەركاسىپتىك جابدىقتاردى جوندەۋشىلەر – 2 367 ادام, سانتەحنيكتەر مەن قۇبىر جوندەۋشىلەر – 2 051 ادام;
- دەنساۋلىق ساقتاۋدا: ورتا بۋىن مەديتسينا قىزمەتكەرلەرى – 24 614 ادام, جەدەل جاردەم جۇرگىزۋشىلەرى – 4 604 ادام, فەلدشەرلەر – 4 536 ادام.
«مانساپ كومپاسى» پلاتفورماسى نەگىزىندە 100 مىڭ ورتا مەكتەپ وقۋشىسىن قامتۋمەن كاسىپتىك باعدار بەرۋ جۇمىستارى جۇرگىزىلەدى. قازىرگى ۋاقىتتا ىسكە قوسىلۋى اعىمداعى جىلدىڭ ءساۋىر ايىنا جوسپارلانعان بۇل پلاتفورمادا كاسىبي دياگنوستيكا فۋنكتسيونالدىعىن ەنگىزۋ بويىنشا جۇمىستار جۇرگىزىلۋدە.
«جاستار تاجىريبەسى» جوباسى اياسىندا جاس مامانداردى وقىتۋ, سونداي-اق تالىمگەرمەن جۇمىس ورنىندا كاسىبي وقىتۋ ءۇشىن كەمىندە 35 مىڭ تالىمگەردى تارتۋ جوسپارلانۋدا.2025 جىلعى 1 ناۋرىزداعى جاعداي بويىنشا جاستار تاجىريبەسىنە 3,2 مىڭ ادام جىبەرىلدى. جەرگىلىكتى اتقارۋشى ورگانداردىڭ مالىمەتىنشە, جاستار تاجىريبەسىنە قاتىسۋشىلارعا 2645 تالىمگەر بەكىتىلگەن», – دەپ قوستى ازيز يبراگيموۆ.
بۇگىنگى تاڭدا Skills Enbek پلاتفورماسىندا 9827 مەكتەپ وقۋشىلارى مەن تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى ونلاين وقىتۋمەن قامتىلدى.
جىل بويىنا «ەلەكتروندىق ەڭبەك بيرجاسى» بىرىڭعاي تسيفرلىق پلاتفورماسىن پايدالانا وتىرىپ, كەمىندە 500 مىڭ مەكتەپ وقۋشىلارى مەن تەحنيكالىق جانە كاسىپتىك ءبىلىم بەرۋ جانە وقىتۋ ۇيىمدارىنىڭ ستۋدەنتتەرى جۇمىس ىزدەۋ جانە جۇمىسقا ورنالاسۋ داعدىلارىنا وقىتۋمەن قامتاماسىز ەتىلەدى. تەحنيكالىق جانە كاسىپتىك ءبىلىم بەرۋدىڭ 1000 ۇزدىك تۇلەگىن ەلىمىزدىڭ جەتەكشى كومپانيالارىنا جۇمىسقا ورنالاستىرۋ جوسپارلانۋدا.
سونىمەن قاتار, جۇمىسسىزداردى كاسىپتىك وقىتۋ جۇمىس بەرۋشىنىڭ جۇمىس ورنىندا التى ايدان اسپايتىن مەرزىمگە ۇيىمداستىرىلادى.
بۇعان دەيىن قر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا جاساندى ينتەللەكت دامۋى اياسىندا قانداي ماماندىقتاردىڭ جويىلىپ كەتۋى مۇمكىن ەكەنىن ايتقان بولاتىن.
