ەلىمىزدىڭ 17 وڭىرىندە پسيحولوگيالىق قولداۋ ورتالىعى اشىلدى

مەملەكەت باسشىسىنىڭ تاپسىرماسىنا سايكەس ەلىمىزدىڭ ءار وڭىرىندە پسيحولوگيالىق قولداۋ ورتالىعىن اشۋ جۇمىستارى جۇرگىزىلۋدە. بۇگىنگى تاڭدا مۇنداي ورتالىقتار 17 وڭىردە اشىلدى,- دەپ حابارلايدى qandastar.kz وقۋ-اعارتۋ مينيسترلىگىنىڭ ءباسپاسوز قىزمەتىنە سىلتەمە جاساپ.

وقۋ-اعارتۋ مينيسترلىگى پسيحولوگيالىق قولداۋ ورتالىقتارىن دامىتۋ ارقىلى پەداگوگ-پسيحولوگتاردىڭ الەۋەتىن ارتتىرۋ بويىنشا جۇمىستار جۇرگىزۋدە. اتالعان ورتالىقتاردىڭ باستى ماقساتى — جەرگىلىكتى جەرلەردە بالالاردىڭ, اتا-انالار مەن پەداگوگتاردىڭ پسيحولوگيالىق ءال-اۋقاتىن نىعايتۋعا جانە ساقتاۋعا باعىتتالعان بىرىڭعاي پسيحولوگيالىق قىزمەت جۇيەسىن قۇرۋ.

«ورتالىقتاردىڭ قىزمەتىن بىرىزدەندىرۋ ءۇشىن مينيسترلىك ادىستەمەلىك ۇسىنىمدار ازىرلەدى. بۇل ۇسىنىمدار وڭىرلەردە ورتالىقتاردى بالالار ءۇشىن جايلى جاعداي جاسالعان بىرىڭعاي ۇلگىدە اشۋعا سەپتىگىن تيگىزەدى. وندا ورتالىقتىڭ مىندەتتەرى, نەگىزگى قىزمەت باعىتتارى, ۇسىنىلاتىن شتات كەستەسى, ءار ماماننىڭ لاۋازىمدىق نۇسقاۋلىقتارى تۋرالى اقپارات قامتىلعان. جەكە تاراۋ ماتەريالدىق-تەحنيكالىق جابدىقتاۋعا ارنالعان», – دەپ اتاپ ءوتتى قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا.

ورتالىقتار وبلىستىڭ پەداگوگ-پسيحولوگتارى ءۇشىن ءبىر-بىرىمەن تاجىريبە الماساتىن, ادىستەمەلىك كەڭەس الاتىن تىرەككە, سونداي-اق وقۋشىلار مەن ولاردىڭ اتا-انالارى كومەك الۋ ءۇشىن جۇگىنەتىن ورىنعا اينالادى. جىل سوڭىنا دەيىن قالعان وبلىستاردا دا ورتالىقتار تولىقتاي اشىلادى دەپ جوسپارلانىپ وتىر.

ايتا كەتۋ كەرەك, ورتالىقتار اشۋ بويىنشا ءىس-شارا بالالاردى زورلىق-زومبىلىقتان قورعاۋ, ءسۋيتسيدتىڭ الدىن الۋ جانە ولاردىڭ قۇقىقتارى مەن سالاماتتىلىعىن قامتاماسىز ەتۋ جونىندەگى 2023-2025 جىلدارعا ارنالعان كەشەندى جوسپاردا كوزدەلگەن.