Elimizdiń 17 óńirinde psıhologııalyq qoldaý ortalyǵy ashyldy

Memleket basshysynyń tapsyrmasyna sáıkes elimizdiń ár óńirinde psıhologııalyq qoldaý ortalyǵyn ashý jumystary júrgizilýde. Búgingi tańda mundaı ortalyqtar 17 óńirde ashyldy,- dep habarlaıdy qandastar.kz Oqý-aǵartý mınıstrliginiń baspasóz qyzmetine silteme jasap.

Oqý-aǵartý mınıstrligi psıhologııalyq qoldaý ortalyqtaryn damytý arqyly pedagog-psıhologtardyń áleýetin arttyrý boıynsha jumystar júrgizýde. Atalǵan ortalyqtardyń basty maqsaty — jergilikti jerlerde balalardyń, ata-analar men pedagogtardyń psıhologııalyq ál-aýqatyn nyǵaıtýǵa jáne saqtaýǵa baǵyttalǵan biryńǵaı psıhologııalyq qyzmet júıesin qurý.

«Ortalyqtardyń qyzmetin birizdendirý úshin Mınıstrlik ádistemelik usynymdar ázirledi. Bul usynymdar óńirlerde ortalyqtardy balalar úshin jaıly jaǵdaı jasalǵan biryńǵaı úlgide ashýǵa septigin tıgizedi. Onda ortalyqtyń mindetteri, negizgi qyzmet baǵyttary, usynylatyn shtat kestesi, ár mamannyń laýazymdyq nusqaýlyqtary týraly aqparat qamtylǵan. Jeke taraý materıaldyq-tehnıkalyq jabdyqtaýǵa arnalǵan», – dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Ortalyqtar oblystyń pedagog-psıhologtary úshin bir-birimen tájirıbe almasatyn, ádistemelik keńes alatyn tirekke, sondaı-aq oqýshylar men olardyń ata-analary kómek alý úshin júginetin orynǵa aınalady. Jyl sońyna deıin qalǵan oblystarda da ortalyqtar tolyqtaı ashylady dep josparlanyp otyr.

Aıta ketý kerek, ortalyqtar ashý boıynsha is-shara Balalardy zorlyq-zombylyqtan qorǵaý, sýııdtiń aldyn alý jáne olardyń quqyqtary men salamattylyǵyn qamtamasyz etý jónindegi 2023-2025 jyldarǵa arnalǵan keshendi josparda kózdelgen.