ەلىمىزدىڭ اۋىل شارۋاشىلىعى سالاسىندا تەحنيكا جەتىسپەيدى

ەسكى تراكتور, كومبايندارمەن مول ءونىم الۋ مۇمكىن ەمەس.

الماتىدا باس قوسقان ينجەنەرلەر مەن اۋىلشارۋاشىلىعى سالاسىنىڭ ماماندارى وسىلاي دەيدى.

جاڭا تەحنولوگيالاردى ەنگىزۋدى جەدەلدەتۋ ءۇشىن اۋەلى مامان دايارلاۋدى كۇشەيتكەن ءجون. عىلىمي تەحنيكالىق-ينجەنەرلىك كورپۋس شەتەلدەن اكەلىنگەن روبوتتار مەن اۆتوماتتى قۇرىلعىلاردى اۋەلى بەيىمدەپ, ءارى قاراي دامىتۋعا اتسالىسادى.

ياعني وسى سالاداعى وزىق تەحنولوگيانى ەلىمىزدە ءوندىرۋ, قۇراستىرۋ اسا ماڭىزدى. مىسالى, قىتاي فەرمەرلەرى درونداردى پايدالانۋ ارقىلى شەگىرتكە سىندى زيانكەستەرمەن كۇرەستى ءتيىمدى جۇرگىزىپ وتىر.

ال ەۋروپا ەلدەرىندە تامشىلاتىپ سۋارۋ سىندى تەحنولوگيا كەڭىنەن دامىعان. اماندىق تولەشوۆ, ۇلتتىق ينجەنەرلىك اكادەمياسىنىڭ ۆيتسە-پرەزيدەنتى: – كوپ ەلدە كوپ نارسە دامىپ كەتتى عوي. سونى دۇرىستاپ پايدالانۋىمىز كەرەك.

ونى باسىنان باستاپ ءوزىمىز جاسايمىز دەگەن بولمايدى. سەبەبى ءبىز بىرىنشىدەن ونى مەڭگەرۋىمىز كەرەك, ءارى قاراي دامىتۋىمىز كەرەك دەپ ويلايمىن. سوعان بايلانىستى كادر دايىنداپ, ارى قاراي تەحنولوگيانى جەتىلدىرۋىمىز كەرەك. ەسكە سالا كەتەيىك, مەملەكەت باسشىسى قاسىم-جومارت توقاەۆ بىلتىر قىركۇيەكتەگى جولداۋىندا اۋىلشارۋاشىلىعىنا تۇبەگەيلى وزگەرىس قاجەت ەكەنىن, تەحنيكانىڭ 80%-ءى توزىپ تۇرعانىن ايتقان بولاتىن.