ەلىمىزدىڭ ءبىلىم بەرۋ ستاندارتىنا ءبىرشاما وزگەرىس ەنگىزىلمەك

ۇلتتىق ءبىلىم بەرۋ جۇيەسىن رەفورمالاۋ بارىسىندا وقۋشىلاردى تۇلعا رەتىندە, ولاردىڭ بىرەگەي قابىلەتتەرىن دامىتۋعا باسىمدىق بەرگەن ءجون. الايدا قازىرگى جالپىلاما وقىتۋ ءتاسىلى بۇعان تولىق مۇمكىندىك بەرمەيدى.

بۇگىن سەناتتىڭ «ۇلتتىق مۇددە» اتتى ديالوگ الاڭىندا وسى ماسەلە تالقىعا سالىندى. ءتۇرلى سالا ساراپشىلارى مەن عالىمدار ءبىلىم بەرۋ سالاسىن دامىتۋدىڭ كەلەشەگىن تىلگە تيەك ەتىپ, ۇتىمدى ۇسىنىستارىن ايتتى.

سەنات توراعاسى ماۋلەن اشىمباەۆ قازىرگى قوعامدى قالىپتاستىرۋدىڭ جانە ۇلتتىق قۇندىلىقتاردى دارىپتەۋدىڭ نەگىزگى فاكتورلارىن اتادى.

ءبىلىم بەرۋ سالاسى ۇدايى پرەزيدەنتتىڭ نازارىندا ەكەنىن دە اتاپ ءوتتى. ماۋلەن اشىمباەۆ, قر پارلامەنتى سەناتىنىڭ توراعاسى: — مەكتەپ – ادامي كاپيتالدىڭ ساپاسىن قالىپتاستىراتىن جانە ەلدىڭ بۇگىنگى بولمىسى مەن بولاشاق الەۋەتىن ايقىندايتىن بىردەن-ءبىر ورتا. وسى ورايدا مەكتەپتىڭ نەگىزگى 3 فۋنكتسيانى جۇزەگە اسىرۋى ماڭىزدى.

ءبىرىنشىسى – ءبىلىم بەرۋ. بۇل رەتتە وقۋشىلاردىڭ تۇلعالىق ەرەكشەلىگىن ەسكەرۋگە, جاڭا, بىرەگەي ءبىلىم بەرۋ باعدارلامالارىن قۇرۋعا, جۇيەلى تۇردە مۇعالىمدەردىڭ بىلىكتىلىگىن ارتتىرۋعا جانە ينتەرنەت پەن تسيفرلى رەسۋرستاردىڭ مۇمكىندىگىن ءتيىمدى پايدالانۋعا باسا ءمان بەرۋ قاجەت. ەكىنشىدەن, وقۋشىلاردىڭ بويىندا ءارتۇرلى داعدىلاردى – «soft skills» دامىتۋ دا – ۇلكەن مىندەت.

قازىر وقۋشىلارعا سىني جانە شىعارماشىلىق ويلاۋ داعدىسىن ۇيرەتۋ, ولاردىڭ بويىنا كوممۋنيكاتسيالىق قابىلەتتەردى, كوماندامەن جۇمىس ىستەۋدى, كەز كەلگەن ورتاعا تەز بەيىمدەلۋدى ءسىڭىرۋ ماڭىزدى. ۇشىنشىدەن, مەكتەپتىڭ تاربيە وشاعى ەكەنىن ۇمىتپاۋىمىز كەرەك.

ادامي جانە ۇلتتىق قۇندىلىقتاردى دارىپتەۋدە, ۇلكەنگە قۇرمەت, كىشىگە ىزەت, ەڭبەكقورلىق, مەيىرىمدىلىك, جاۋاپكەرشىلىك سياقتى قاسيەتتەردى جاس بۋىننىڭ ساناسىنا سىڭىرۋدە مەكتەپتەردىڭ ءرولىن ارتتىرعان ابزال. ال عالىمدار ءبىلىم بەرۋ ستاندارتتارىنا ءبىرشاما وزگەرىستەر ەنگىزگەلى وتىرعانىن ايتتى. ونىڭ جوباسى دا دايىن.

ءار ءپاننىڭ وقىتۋ باعدارلاماسى ابايدىڭ «تولىق ادام» ءىلىمى نەگىزىندە جيناستىرىلعان. ماماندار: «وسى ارقىلى ءار بالا ءوزىن جەكە تۇلعا رەتىندە كورە الادى», – دەيدى.

رۋسلان قاراتابانوۆ, ى.التىنسارين اتىنداعى ۇلتتىق ءبىلىم اكادەمياسىنىڭ ۆيتسە-پرەزيدەنتى: — ءا. فارابي بابامىز ايتقانداي «تاربيەسىز بەرىلگەن ءبىلىم – ادامزاتتىڭ قاس جاۋى» دەمەكشى, ءبىز ءبىلىم مازمۇنىمەن قوسا بالاعا تاربيە بەرۋىمىز كەرەك. بىراق قازىرگى بالا, بۋىن, زامان باسقا. تاربيە بەرۋ تەتىكتەرى مەن قۇرالدارى تۇبەگەيلى وزگەرىستەرگە ۇشىرادى. قازىر قۇندىلىققا نەگىزدەلگەن ءبىلىم دەگەن قاعيدات باستى ورىن الىپ وتىر.

ول ءبىزدىڭ ستاندارتتاردا, ءبىلىم بەرۋ باعدارلامالارىندا دا كورىنىس تاپقان.