ەلىمىزدىڭ ىشكى ىستەر مينيسترلىگى رەسەيلىكتەرگە قازاقستان ازاماتتىعىن ساتۋ تۋرالى اقپاراتتى جوققا شىعاردى

فوتو: اشىق دەرەككوز

باق بەتتەرىندە رەسەيلىكتەر قازاقستان ازاماتتىعىن 6500 ەۋروعا ساتىپ الا الاتىنى تۋرالى اقپارات تارادى. ەلىمىزدىڭ ىشكى ىستەر مينيسترلىگى وسى قاۋەسەتكە قاتىستى پىكىر ءبىلدىردى. بۇل تۋرالى qandastar.kz  Stan.kz اقپارات اگەنتتىگى حابارلايدى.

جەلىدە رەسەيلىكتەر قازاقستان ازاماتتىعىن 6500 ەۋروعا, ودان قالدى ءبولىپ تولەۋ مۇمكىندىگىمەن ساتىپ الۋعا بولاتىنى تۋرالى اقپارات تاراعان ەدى. ىشكى ىستەر مينيسترلىگى بۇل اقپاراتتى جوققا شىعاردى.

«ينتەرنەتتە ىشكى ىستەر ورگاندارىندا بىرقاتار كوشى-قون قىزمەتتەرىن الۋ, ونىڭ ىشىندە ازاماتتىققا قابىلداۋ, قۇجاتتاردى جيناۋ جانە رەسىمدەۋ قىزمەتتەرىن كورسەتەتىن كومپانيالاردىڭ جارنامالارى جاريالانىپ ءجۇر», – دەلىنگەن حابارلامادا.

ۆەدومستۆو ازاماتتارعا الاياقتاردىڭ ارباۋىنا ءتۇسىپ قالۋى مۇمكىن ەكەنىن ەسكەرتتى.

“ايتا كەتۋ كەرەك, بۇل فيرمالار ازاماتتىقتى دا, جەكە باسىن كۋالاندىراتىن قۇجاتتاردى دا بەرمەيدى. وسىعان بايلانىستى ءىىم وسى سالاداعى ينتەرنەت ارقىلى الاياقتىقتىڭ ىقتيمال جاعدايلارى تۋرالى ەسكەرتەدى. قازاقستان ازاماتتىعىن الۋ ءۇشىن ءوتىنىش بىلدىرۋشىلەر ىشكى ىستەر ورگاندارىنا جەكە ءوزى جۇگىنۋگە ءتيىس. بۇل رەتتە قۇجاتتاردى سەنىمحات بويىنشا نەمەسە ءۇشىنشى تۇلعالار ارقىلى بەرۋگە تىيىم سالىنادى”, – دەپ مالىمدەدى ىشكى ىستەر مينيسترلىگى.