جاڭالىقتار
ەلوردادا 140-تان استام جول اپاتى بولىپ, 12 ادام زارداپ شەكتى
فوتو:Zakintos.kz
12 قازاندا كەشكىسىن استانادا 120 جول-كولىك وقيعاس تىركەلىپ, 12 ادام زارداپ شەكتى, دەپ حابارلايدى qandastar.kz Zakon.kz-كە سىلتەمە جاساپ.
«اۋا-رايىنىڭ كۇرت ناشارلاۋىنا بايلانىستى (قار, كوكتايعاق) 12 قازاندا ەلوردا جولدارىندا 118 جول – كولىك وقيعاسى تىركەلدى, 12 ادام دەنە جاراقاتىن الدى», – دەدى ۆەدومستۆودان.
سونداي-اق 13 قازاندا تۇنگى 00:00-دەن 08:00-گە دەيىن 28 جول-كولىك وقيعاسى بولدى. زارداپ شەككەندەر جوق.
پوليتسيا جۇرگىزۋشىلەردەن جولدا وتە مۇقيات بولۋدى, بەلگىلەنگەن جىلدامدىق رەجيمىن قاتاڭ ساقتاۋدى, تەجەگىشتى قاتتى باسپاۋدى, قاشىقتىق پەن بۇيىرلىك ارالىقتى ساقتاۋدى, بەلگىلەنگەن جەرلەردە كولىكتى قالدىرۋدى, سونداي-اق پاترۋلدىك پوليتسەيلەردىڭ تالاپتارىن ورىنداۋدى سۇرايدى.
«اتالعان جاعدايعا تۇسىنىستىكپەن قاراۋدى سۇرايمىز جانە قولايسىز مەتەو جاعدايعا بايلانىستى قالا سىرتىنداعى تراسسالاردا كولىك قوزعالىسى مەزگىل-مەزگىل شەكتەلەتىنىن ەسكەرە وتىرىپ, ۇزاق ساپارعا شىعۋدان باس تارتا تۇرۋدى ۇسىنامىز. جۇرگىزۋشىلەر عانا ەمەس, جاياۋ جۇرگىنشىلەر دە ساق بولۋى كەرەك. ءوز قاۋىپسىزدىگىڭىزدىڭ مۇددەسى ءۇشىن كوشەلەردى بەلگىلەنگەن ورىنداردان كەسىپ وتۋگە, جارىق قايتاراتىن ەلەمەنتتەردى پايدالانۋعا, قۇلاققاپ تاقپاي, جولدان ءوتۋ كەزىندە تەلەفونمەن سويلەسپەۋگە كەڭەس بەرەمىز», – دەپ تولىقتىردى پد.
