ەلوردادا «جاستار تاجىريبەسى» باعدارلاماسىنا سۇرانىس ارتتى

بىلتىر بۇل باعىتقا 900 ورىن جوسپارلانعان, بىراق جىل سوڭىنا دەيىن قاتىسۋشىلار سانى مىڭنان اسىپ كەتكەن. سونىمەن قاتار «العاشقى جۇمىس ورنى» جانە «ۇرپاقتار كەلىسىمشارتى» جوبالارى دا جاس مامانداردىڭ ەڭبەك جولىنا باستاۋ بولىپ, كاسىبي تۇرعىدا شىڭدالۋدا ىقپال ەتىپ وتىر.

جارقىناي ەلورداداعى جوعارى وقۋ ورنىن قۇقىقتانۋ ماماندىعى بويىنشا بىلتىر عانا ءتامامدادى. ول ەڭبەك جولىن الدىمەن «جاستار تاجىريبەسى» باعدارلاماسىمەن ۇشتاستىرۋدى ۇيعارىپتى. وسى ءادىس ارقىلى قالالىق قىلمىستىق ىستەر جونىندەگى اۋدانارالىق سوتىندا تاعىلىمدامادان وتكەن.

مۇمكىندىكتى ءتيىمدى پايدالانا بىلگەن جارقىناي كەيىن سول مەكەمەگە جەتەكشى مامان بولىپ تۇراقتى جۇمىسقا ورنالاستى. جارقىناي ساپاربەك, جاس مامان: — نەگىزى كەلىسىمشارت 6 ايعا سوزىلادى. مەن مۇندا 4 اي بويى جۇمىس جاساپ, بىلىكتىلىگىمدى كورسەتە ءبىلىپ, 4 ايدىڭ ىشىندە وسىندا جۇمىسقا ورنالاسا الدىم. «جاستار تاجىريبەسى» جوباسى وتە ءتيىمدى بولدى. ماعان ۇلكەن مۇمكىندىك بولدى. جۇمىس بارىسى قاتتى قيىن ەمەس.

ءوزىمنىڭ تاجىريبەلى ارىپتەستەرىمنەن ۇيرەنەرىم كوپ. ۇيرەنىپ الىپ جاتقاندارىم دا كوپ. مەكەمەلەر مەن ءوندىرىس ورىندارىنىڭ كوبى قىزمەتكە تەك ەڭبەك ءوتىلى بار مامانداردى الادى. سوندىقتان ديپلومىن ەندى عانا العان جاستار جۇمىس تاپپاي الەك بولاتىنى راس. «جاستار تاجىريبەسى» جوباسى ءدال وسى ماسەلەنى شەشۋگە باعىتتالىپ وتىر. بيىل استانادا بۇل باعدارلاما اياسىندا 900 كۆوتا بولىنگەن. باعيلا ورىمبەتوۆا, قالالىق مانساپ ورتالىعىنىڭ ديرەكتورى: — بىلتىر دا سول 900 بولدى, بىراق 900-دەن اسىپ, 1052 ادام قاتىستى. جۇمىسقا ورنالاسۋى 50 پايىزداي بار. ياعني, تەڭ جارتىسى جۇمىسقا تۇرىپ كەتتى. «جاستار تاجىريبەسى» 5 جىل بولسا, «العاشقى جۇمىس ورنى» 3 جىل وتپەۋ كەرەك ديپلومىنا.

جالاقىسىن ەڭبەك موبيلدىلىگى ورتالىعىنان تولەنەدى 12 اي بويى. مولشەرى 30 اەك, ول 110 760 تەڭگە. سونىمەن قاتار جۇمىس بەرۋشىلەر «ۇرپاقتار كەلىسىمشارتى» جوباسى ارقىلى ۇجىمداعى زەينەت جاسىنا تاياعان قىزمەتكەردىڭ ءىزباسارىن دايىنداي الادى. ياعني, تاجىريبەلى مامان زەينەتكەرلىككە جارتى جىل قالعاندا جاس كادرعا جەتەكشىلىك ەتىپ, تاعىلىمدامادان وتكىزۋى ءتيىس. باعيلا ورىمبەتوۆا, قالالىق مانساپ ورتالىعىنىڭ ديرەكتورى: — بىلتىر ءبىز 17 ادامدى وسى باعدارلاما بويىنشا جۇمىسقا تۇرعىزدىق. بيىل جوسپار بويىنشا 8 ادام. الايدا جۇمىس بەرۋشىلەردىڭ سۇرانىمى بولۋ كەرەك. بولىپ جاتسا, ىزدەۋشىلەردىڭ ىشىنەن سۇرانىس بولىپ جاتسا, جوسپاردان تىس ورىنداۋعا بولادى.

وسىلايشا قازىر جاستار مەملەكەتتىك قولداۋدىڭ يگىلىگىن كورىپ وتىر. جىل باستالعالى 1 200 جاس مامان تۇراقتى جانە ۋاقىتشا جۇمىسپەن قامتىلدى.