ELORDADA «JASTAR TÁJIRIBESI» BAǴDARLAMASYNA SURANYS ARTTY

Byltyr bul baǵytqa 900 oryn josparlanǵan, biraq jyl sońyna deıin qatysýshylar sany myńnan asyp ketken. Sonymen qatar «Alǵashqy jumys orny» jáne «Urpaqtar kelisimsharty» jobalary da jas mamandardyń eńbek jolyna bastaý bolyp, kásibı turǵyda shyńdalýda yqpal etip otyr.

Jarqynaı elordadaǵy joǵary oqý ornyn quqyqtaný mamandyǵy boıynsha byltyr ǵana támamdady. Ol eńbek jolyn aldymen «Jastar tájirıbesi» baǵdarlamasymen ushtastyrýdy uıǵarypty. Osy ádis arqyly qalalyq qylmystyq ister jónindegi aýdanaralyq sotynda taǵylymdamadan ótken.

Múmkindikti tıimdi paıdalana bilgen Jarqynaı keıin sol mekemege jetekshi maman bolyp turaqty jumysqa ornalasty. Jarqynaı Saparbek, jas maman: — Negizi kelisimshart 6 aıǵa sozylady. Men munda 4 aı boıy jumys jasap, biliktiligimdi kórsete bilip, 4 aıdyń ishinde osynda jumysqa ornalasa aldym. «Jastar tájirıbesi» jobasy óte tıimdi boldy. Maǵan úlken múmkindik boldy. Jumys barysy qatty qıyn emes.

О́zimniń tájirıbeli áriptesterimnen úırenerim kóp. Úırenip alyp jatqandarym da kóp. Mekemeler men óndiris oryndarynyń kóbi qyzmetke tek eńbek ótili bar mamandardy alady. Sondyqtan dıplomyn endi ǵana alǵan jastar jumys tappaı álek bolatyny ras. «Jastar tájirıbesi» jobasy dál osy máseleni sheshýge baǵyttalyp otyr. Bıyl Astanada bul baǵdarlama aıasynda 900 kvota bólingen. Baǵıla Orymbetova, qalalyq mansap ortalyǵynyń dırektory: — Byltyr da sol 900 boldy, biraq 900-den asyp, 1052 adam qatysty. Jumysqa ornalasýy 50 paıyzdaı bar. Iaǵnı, teń jartysy jumysqa turyp ketti. «Jastar tájirıbesi» 5 jyl bolsa, «Alǵashqy jumys orny» 3 jyl ótpeý kerek dıplomyna.

Jalaqysyn Eńbek mobıldiligi ortalyǵynan tólenedi 12 aı boıy. Mólsheri 30 AEK, ol 110 760 teńge. Sonymen qatar jumys berýshiler «Urpaqtar kelisimsharty» jobasy arqyly ujymdaǵy zeınet jasyna taıaǵan qyzmetkerdiń izbasaryn daıyndaı alady. Iaǵnı, tájirıbeli maman zeınetkerlikke jarty jyl qalǵanda jas kadrǵa jetekshilik etip, taǵylymdamadan ótkizýi tıis. Baǵıla Orymbetova, qalalyq mansap ortalyǵynyń dırektory: — Byltyr biz 17 adamdy osy baǵdarlama boıynsha jumysqa turǵyzdyq. Bıyl jospar boıynsha 8 adam. Alaıda jumys berýshilerdiń suranymy bolý kerek. Bolyp jatsa, izdeýshilerdiń ishinen suranys bolyp jatsa, jospardan tys oryndaýǵa bolady.

Osylaısha qazir jastar memlekettik qoldaýdyń ıgiligin kórip otyr. Jyl bastalǵaly 1 200 jas maman turaqty jáne ýaqytsha jumyspen qamtyldy.