ەلورداداعى بوتانيكالىق باقتا بالىق قىرىلدى

فوتو:سكرين

استانا تۇرعىندارى بوتانيكالىق باقتاعى بالىقتاردىڭ قىرىلىپ جاتقانىن ۆيدەوعا ءتۇسىرىپ العان. قالا اكىمدىگى اتالعان جاعدايعا قاتىستى تۇسىنىك بەردى, دەپ جازدى qandastar.kz

اكىمدىك جاساندى كولشىكتىڭ بالىق وسىرۋگە ارنالماعانىن ايتتى.

«بوتانيكالىق باقتاعى جاساندى كولشىك اۋەلدە ينجەنەرلىك جۇيەنىڭ ءبىر بولىگى رەتىندە, ياعني كوگالداردى سۋارۋ مەن فونتاننىڭ جۇمىسىنا بولا جاسالعان. ونىڭ قۇرىلىمى بالىق وسىرۋگە نەمەسە بالىقتىڭ مەكەندەۋىنە ساي كەلمەيدى», – دەلىنگەن حابارلامادا.

سونداي-اق اكىمدىك بۇندا بالىقتاردىڭ قالاي كەلگەنىن ءتۇسىندىردى.

«بۇل سۋ كوزى «نۇرا» كانالى ارقىلى تولتىرىلىپ وتىرادى, كىشكەنە شاباقتار سول جولمەن كولشىككە تۇسكەن بولۋى مۇمكىن. كانالدان سۋ كەلەتىن جولدا ارنايى توسقاۋىل تور قويىلعان. ول ءىرى بالىقتاردىڭ وتۋىنە جول بەرمەگەنمەن, ۋىلدىرىقتار مەن شاباقتاردى توسا المايدى. بۇعان دەيىن (2022 جىلى) سۋداعى جاندىكتەردى ساقتاۋ ءۇشىن قىس مەزگىلىندە مۇزدى بۇرعىلاۋ جۇمىستارى جۇرگىزىلدى. بىراق سۋ كوزى جاساندى بولعاندىقتان جانە تاياز بولۋى سەبەپتى بۇل ءتاسىل پايدا بەرمەدى. كولشىك تابانىنا دەيىن مۇز بوپ قاتىپ قالدى», – دەلىنگەن مالىمدەمەدە.