جاڭالىقتار
ەلجان ءبىرتانوۆ 1,3 ملرد تەڭگەنى 71 جاسىنا دەيىن قالاي تولەيتىنىن ايتتى
فوتو: اشىق دەرەككوز
ءىستى بولعان بۇرىنعى دەنساۋلىق ساقتاۋ ءمينيسترى ەلجان ءبىرتانوۆ مەملەكەتكە قارىزىن قالاي وتەپ جاتقانىن ايتتى, دەپ حابارلايدى qandastar.kz سايتىنا سىلتەمە جاساپ.
بۇل تۋرالى ول «Ne boldy» YouTube ارناسىنا بەرگەن سۇحباتىندا باياندادى.
ونىڭ ايتۋىنشا, ول جانە ورىنباسارى ولجاس ءابىش ۇكىمەتكە 1,3 ميلليارد تەڭگە قارىز. بۇل اقشانى تولەۋ مىندەتىن ەكەۋى ءبولىپ وتەيىن دەپ جاتىر.
«سوتتا ءبىزدىڭ كىنامىز دالەلدەنبەسە دە, ءبىز قازىر ولجاس ەكەۋىمىز بۇل سومانى ءبولىپ تولەۋىمىز كەرەك. اقشانى تولەۋ اياقتالعان سوڭ بوساتىلامىز. بۇل قارىزدى تەڭ ءبولىپ تولەۋ دەگەن قاعيدا جوق. ەگەر مەنىڭ ايلىعىم كوپ بولسا, مەن 1 ميلليارد تەڭگەنى, ال ولجاس قالعان اقشانى تولەۋگە ءتيىس. ءبىز بۇل قاراجاتتى دەنساۋلىق ساقتاۋ مينيسترلىگىنە قايتارۋىمىز كەرەك. سونىمەن قاتار, ءبىزدىڭ مۇلكىلەرىمىز دە تاركىلەندى. الماتىدا اكەم ەكەۋمىز 2005 جىلى سوققان ءۇيىمىز بار, سول ءۇي ارەستتە تۇر. ءبىز ءۇيدى ساتىپ, اقشانى ۇكىمەتكە تولەۋىمىز كەرەك», — دەدى ەكس-مينيستر.
ول سونداي-اق وزدەرىنىڭ مۇلكىنە قاتىستى بىرقاتار جاعدايدى دا ايتىپ ءوتتى.
«ءۇيىمىزدى ءتىنتۋ جۇرگىزگەن كەزدە «تەلەديدارىڭىزدى الامىز» دەپ ايتادى. الساڭىزدار, الىڭدار, ءتىپتى ءىش كيىمدەرىمە دەيىن اكەتىڭدەر دەپ ايتامىن. بىراق وعان دەيىن جەتكەن جوقپىن, سەبەبى زاڭ بويىنشا ءبىز قازاقستان ازاماتتارى رەتىندە جۇمىس ىستەۋگە, وتباسىمىزدى اسىراۋعا قۇقىلى ەكەنىمىزدى بىلەمىن. بىزگە مەملەكەتتىك قىزمەتتەن باسقا جۇمىستاردى ىستەۋگە رۇقسات بەرىلدى. العان جالاقىمىزدىڭ تەڭ جارتىسىن ۇكىمەتكە تولەپ وتىرمىز», — دەپ ءتۇسىندىردى.
سونىمەن قاتار ءبىرتانوۆ قارىزدى قايتارۋ ءۇشىن اي سايىن 3 ميلليون تەڭگە تولەۋگە تۋرا كەلەتىنىن جاسىرمادى.
«قازاقستاندا ەر ادامداردىڭ ورتاشا ءومىر ءسۇرۋ ۇزاقتىعى 71 جاس ەكەن. ءبىز سول جاسقا دەيىن بۇل قارىزدى تولىق قايتارۋ ءۇشىن ايلىق تابىسىمىز 6 ميلليون تەڭگە بولۋى كەرەك. ەگەر اي سايىن 3 ميلليون تەڭگە تولەسەك, 71 جاسقا دەيىن قارىزدان قۇتىلامىز. بىراق مەن ءبىر كۇنى بۇل شەشىمنىڭ تولىق جويىلاتىنىنا سەنەمىن», — دەدى ول.
