Eljan Birtanov 1,3 mlrd teńgeni 71 jasyna deıin qalaı tóleıtinin aıtty

Foto: ashyq derekkóz

Isti bolǵan burynǵy densaýlyq saqtaý mınıstri Eljan Birtanov memleketke qaryzyn qalaı ótep jatqanyn aıtty, dep habarlaıdy qandastar.kz saıtyna silteme jasap.

Bul týraly ol «Ne boldy» YouTube arnasyna bergen suhbatynda baıandady.

Onyń aıtýynsha, ol jáne orynbasary Oljas Ábish úkimetke 1,3 mıllıard teńge qaryz. Bul aqshany tóleý mindetin ekeýi bólip óteıin dep jatyr.

«Sotta bizdiń kinámiz dáleldenbese de, biz qazir Oljas ekeýimiz bul somany bólip tóleýimiz kerek. Aqshany tóleý aıaqtalǵan soń bosatylamyz. Bul qaryzdy teń bólip tóleý degen qaǵıda joq. Eger meniń aılyǵym kóp bolsa, men 1 mıllıard teńgeni, al Oljas qalǵan aqshany tóleýge tıis. Biz bul qarajatty densaýlyq saqtaý mınıstrligine qaıtarýymyz kerek. Sonymen qatar, bizdiń múlkilerimiz de tárkilendi. Almatyda ákem ekeýmiz 2005 jyly soqqan úıimiz bar, sol úı arestte tur. Biz úıdi satyp, aqshany úkimetke tóleýimiz kerek», — dedi eks-mınıstr.

Ol sondaı-aq ózderiniń múlkine qatysty birqatar jaǵdaıdy da aıtyp ótti.

«Úıimizdi tintý júrgizgen kezde «teledıdaryńyzdy alamyz» dep aıtady. Alsańyzdar, alyńdar, tipti ish kıimderime deıin áketińder dep aıtamyn. Biraq oǵan deıin jetken joqpyn, sebebi zań boıynsha biz Qazaqstan azamattary retinde jumys isteýge, otbasymyzdy asyraýǵa quqyly ekenimizdi bilemin. Bizge memlekettik qyzmetten basqa jumystardy isteýge ruqsat berildi. Alǵan jalaqymyzdyń teń jartysyn úkimetke tólep otyrmyz», — dep túsindirdi.

Sonymen qatar Birtanov qaryzdy qaıtarý úshin aı saıyn 3 mıllıon teńge tóleýge týra keletinin jasyrmady.

 «Qazaqstanda er adamdardyń ortasha ómir súrý uzaqtyǵy 71 jas eken. Biz sol jasqa deıin bul qaryzdy tolyq qaıtarý úshin aılyq tabysymyz 6 mıllıon teńge bolýy kerek. Eger aı saıyn 3 mıllıon teńge tólesek, 71 jasqa deıin qaryzdan qutylamyz. Biraq men bir kúni bul sheshimniń tolyq joıylatynyna senemin», — dedi ol.