«ەمدەلمەسە – ءولتىرۋ كەرەك»: ءاۋتيزمى بار بالالاردى قورلاعان بلوگەرگە قاتىستى ءىس قوزعالدى

فوتو: جەكە پاراقشا

80 مىڭنان استام وقىرمانى بار قازاقستاندىق بلوگەر جەلىدەگى پاراقشاسىندا ءاۋتيزمى بار بالالاردى ولتىرۋگە اشىق شاقىردى. ونىڭ بۇل سوزىنە «اۋتيزم قازاقستان» قاۋىمداستىعى مەن ىشكى ىستەر مينيسترلىگى پىكىر ءبىلدىردى, دەپ حابارلايدى qandastar.kz  اقپارات پورتالى Azattyq Rýhy-نا سىلتەمە جاساپ.

داۋ تۋدىرعان پىكىر الماتىدا بولعان وقيعادان كەيىن ايتىلدى. وندا 13 جاستاعى ءجاسوسپىرىم بالالار الاڭىندا ەكى جاسار بالانى كوتەرىپ, اسپانعا لاقتىرىپ جىبەرگەن. سالدارىنان ءسابي قولىن سىندىرىپ الدى. اتالعان دەرەك بويىنشا قىلمىستىق ءىس قوزعالدى.

وسى وقيعاعا قاتىستى جازبالاردىڭ استىنا بلوگەر رايحان جۇمامۇراتوۆا مىناداي پىكىر قالدىردى:

«ءاۋتيزمى بار بالا كوشەدە نە ىستەپ ءجۇر? ونىڭ اتا-اناسىن جازالاۋ كەرەك. قازىر اۋتيزم تىم كوبەيىپ كەتتى, ونى ەمدەۋ قاجەت, ال ەمدەلمەسە – ءولتىرۋ كەرەك. نەمەسە مۇنداي بالالارعا بولەك اۋرۋحانا اشسىن. ءاۋتيزمى بار بالادا سەزىم بولمايدى. اكە-شەشەسى نەگە ءمان بەرمەيدى? نەگە وسىنداي دياگنوزى بار بالالارىن كوشەگە ەش ساسپاستان جىبەرىپ قويىپ, اي قاراپ جۇرەدى?» – دەيدى.

الايدا ءجاسوسپىرىمنىڭ ناقتى دياگنوزى تۋرالى رەسمي اقپارات جاريالانباعان. كەيىنىرەك بلوگەردىڭ پاراقشاسى جابىلعان نەمەسە اتاۋى وزگەرگەن, بىراق «اۋتيزم قازاقستان» قاۋىمداستىعىنىڭ مالىمەتىنشە, ونىڭ باسقا پاراقشاسىندا ۇقساس پىكىرلەر ءالى دە شىعىپ جاتىر.

«Autism Kazakhstan» قاۋىمداستىعى باس پروكۋراتۋرا مەن ءىىم-گە رەسمي ساۋال جولدادى. وندا بلوگەردىڭ سوزدەرىنە قۇقىقتىق باعا بەرۋدى سۇرادى. سونداي-اق ۇيىم ءوز جازباسىندا پىكىر قالدىرۋشىلاردى ادەپتى بولۋعا, بالاعات پەن قورلايتىن سوزدەر قولدانباۋعا شاقىردى. ەرەجەگە ساي كەلمەيتىن پىكىرلەر وشىرىلەتىنى ەسكەرتىلدى.

ءىىم قاۋىمداستىقتىڭ ءوتىنىشى قابىلدانعانىن جانە تەكسەرىس باستالعانىن راستادى.

«بۇل فاكتى بويىنشا الماتى قالاسى پوليتسيا دەپارتامەنتى قىلمىستىق ءىس قوزعادى. بلوگەردىڭ جەكە باسى انىقتالدى», – دەپ حابارلادى ۆەدومستۆو.

سونىمەن بىرگە مينيسترلىك بالاعات سوزدەر, الەۋمەتتىك ارازدىقتى قوزدىرۋ بەلگىلەرى بار ارەكەتتەر, سونداي-اق قاتىگەزدىك پەن زورلىق-زومبىلىقتى ناسيحاتتاۋ ءۇشىن قىلمىستىق ءارى اكىمشىلىك جاۋاپكەرشىلىك قاراستىرىلعانىن ەسكە سالدى.