«Emdelmese – óltirý kerek»: Aýtızmi bar balalardy qorlaǵan blogerge qatysty is qozǵaldy

Foto: jeke paraqsha

80 myńnan astam oqyrmany bar qazaqstandyq bloger jelidegi paraqshasynda aýtızmi bar balalardy óltirýge ashyq shaqyrdy. Onyń bul sózine «Aýtızm Qazaqstan» qaýymdastyǵy men Ishki ister mınıstrligi pikir bildirdi, dep habarlaıdy qandastar.kz  aqparat portaly Azattyq Rýhy-na silteme jasap.

Daý týdyrǵan pikir Almatyda bolǵan oqıǵadan keıin aıtyldy. Onda 13 jastaǵy jasóspirim balalar alańynda eki jasar balany kóterip, aspanǵa laqtyryp jibergen. Saldarynan sábı qolyn syndyryp aldy. Atalǵan derek boıynsha qylmystyq is qozǵaldy.

Osy oqıǵaǵa qatysty jazbalardyń astyna bloger Raıhan Jumamuratova mynadaı pikir qaldyrdy:

«Aýtızmi bar bala kóshede ne istep júr? Onyń ata-anasyn jazalaý kerek. Qazir aýtızm tym kóbeıip ketti, ony emdeý qajet, al emdelmese – óltirý kerek. Nemese mundaı balalarǵa bólek aýrýhana ashsyn. Aýtızmi bar balada sezim bolmaıdy. Áke-sheshesi nege mán bermeıdi? Nege osyndaı dıagnozy bar balalaryn kóshege esh saspastan jiberip qoıyp, aı qarap júredi?» – deıdi.

Alaıda jasóspirimniń naqty dıagnozy týraly resmı aqparat jarııalanbaǵan. Keıinirek blogerdiń paraqshasy jabylǵan nemese ataýy ózgergen, biraq «Aýtızm Qazaqstan» qaýymdastyǵynyń málimetinshe, onyń basqa paraqshasynda uqsas pikirler áli de shyǵyp jatyr.

«Autism Kazakhstan» qaýymdastyǵy Bas prokýratýra men IIM-ge resmı saýal joldady. Onda blogerdiń sózderine quqyqtyq baǵa berýdi surady. Sondaı-aq uıym óz jazbasynda pikir qaldyrýshylardy ádepti bolýǵa, balaǵat pen qorlaıtyn sózder qoldanbaýǵa shaqyrdy. Erejege saı kelmeıtin pikirler óshiriletini eskertildi.

IIM qaýymdastyqtyń ótinishi qabyldanǵanyn jáne tekseris bastalǵanyn rastady.

«Bul fakti boıynsha Almaty qalasy Polıııa departamenti qylmystyq is qozǵady. Blogerdiń jeke basy anyqtaldy», – dep habarlady vedomstvo.

Sonymen birge mınıstrlik balaǵat sózder, áleýmettik arazdyqty qozdyrý belgileri bar áreketter, sondaı-aq qatygezdik pen zorlyq-zombylyqty nasıhattaý úshin qylmystyq ári ákimshilik jaýapkershilik qarastyrylǵanyn eske saldy.