جاڭالىقتار
«ەمىمە 45 ملن تەڭگە كەرەك»: بۇرىنعى كۇيەۋى ورتەپ جىبەرگەن ايەل ادىلدىك ىزدەپ ءجۇر
فوتو: استانا تەلەارناسى
الماتىدا ءۇش جىل بۇرىن كۇيەۋى ورتەپ جىبەرىپ, اجال اۋزىنان قالعان ينديرا تەرگەۋباەۆا ءالى كۇنگە دەيىن ادىلدىككە جەتە الماي ءجۇر. ول پيكەتكە شىعىپ, قوعامنىڭ نازارىن اۋدارىپ كومەك سۇرادى.
ينديرا تەرگەۋباەۆا ءورت وقيعاسى بويىنشا ءىستىڭ جابىلۋىنا نارازى جانە بۇرىنعى كۇيەۋىن دەر كەزىندە دەپورتاتسيالاماعان كوشى-قون پوليتسياسى قىزمەتكەرلەرىنىڭ جازالانۋىن تالاپ ەتىپ وتىر.
ينديرانىڭ بازىناسىن Sputnik قازاقستان ءتىلشىسى تىڭداپ قايتتى.
تەرگەۋباەۆانىڭ باسىنداعى قايعىلى وقيعا 2021 جىلى بولعان. ونى اجىراسىپ كەتكەن كۇيەۋى دۇكەنىمەن قوسىپ ورتەپ جىبەرگەن.
«ماعان وسى ءۇش جىلدا جالپى 9 وتا جاسالدى, بىراق دەنساۋلىعىم تۇزەلمەدى. سول ەكىنشى توپتاعى مۇگەدەك كۇيى قالدىم. پيكەتكە شىعۋعا ءماجبۇرمىن. بىلتىر مامىردان بەرى ءىستى انتيكور ەكى رەت ءىستى جاپتى. پرەزيدەنت اكىمشىلىگىنە ارىز جازدىم. انتيكورداعىلاردىڭ ايتۋىنشا, قىلمىس قۇرىلىمى جوق. جاۋاپتى ماماندار ءتيىستى جازاسىن الدى, قايتا-قايتا جاۋاپقا تارتپايمىز, ولار ەسكەرتۋ الدى, دەيدى. بۇل جەمقورلىق دەپ ويلايمىن», – دەيدى ينديرا تەرگەۋباەۆا.
ينديرانىڭ نەكەدە بولعان كۇيەۋى – شەتەل ازاماتى. جابىرلەنۋشىنىڭ ايتۋىنشا, جوعارعى سوت ونى دەپورتاتسيالاۋ تۋرالى ۇكىم شىعارعان. الايدا ءبىر جارىم جىل بويى كوشى-قون پوليتسياسى ونى قازاقستاننان شىعارماعان.
«جوعارعى سوتتىڭ دەپورتاتسيالاۋ تۋرالى شەشىمى بولسا دا, كوشى-قون پوليتسياسى ول ادامدى قازاقستاننان شىعارمادى. ول مەنى ولتىرەمىن دەپ ۇنەمى قورقىتاتىن, ىلعي پوليتسياعا بارىپ شاعىمداناتىنمىن. اقىرى 40 ليتر بەنزيندى اكەلىپ, دۇكەنمەن قوسا مەنى ورتەپ جىبەردى», – دەيدى جابىرلەنۋشى.
ينديرا قازىرگى قالالىق پروكۋراتۋرانىڭ دا ەسىگىن توزدىرىپ ءجۇر. ماقساتى ءوز مىندەتتەرىن دۇرىس ورىنداماعان قۇزىرلى مەكەمە ماماندارىن جاۋاپقا تارتۋ.
«كۇيەۋى ورتەنىپ كەتتى, كۇدىكتى ءولدى دەپ ءىستى جاۋىپ تاستاپ جاتىر. قالالىق پروكۋرور قارىمساقوۆ دەگەن پروكۋرورعا تاپسىرما بەردى. مىنە 1,5 اي بولدى, ءىس سول كۇيى تۇر. پروكۋراتۋرا دا دۇرىس قاراماي جاتىر. مەنىڭ تالابىم – كوشى-قون پوليتسياسى زاڭدى تۇردە جازاسىن السىن, شەشىمدى ورىنداماعاندار تۇرمەگە وتىرسىن. سولار دەر كەزىندە دەپورتاتسيا جاساعاندا مەن مۇگەدەك بولماس ەدىم, بۇرىنعى كۇيەۋىم ورتەمەس پە ەدى. ءتىپتى كوشى-قون پوليتسياسىنىڭ ماماندارى ەشبىرى مەنەن كەشىرىم سۇراعان جوق. نە تۇرمەگە جابىلسىن نەمەسە مەنىڭ ادام كورگىسىز بولىپ قالعان ءتۇرىمدى قالپىنا كەلتىرىپ, ەمىمدى الۋ ءۇشىن قارجىلاي كومەك بەرسىن. مەنىڭ دەنساۋلىعىم قالپىنا كەلۋ ءۇشىن 45 ملن تەڭگە كەرەك», – دەيدى ينديرا تەرگەۋباەۆا.
ينديرانى تولىق قالپىنا كەلتىرۋ تەك كورەيالىق دارىگەرلەردىڭ قولىنان كەلەدى ەكەن. ءوز قىزمەتىن ولار 100 مىڭ دوللارعا باعالاپتى. ينديرا تەرگەۋباەۆا قازىر ەش جەردە جۇمىس ىستەمەيدى, ويتكەنى ەڭبەككە جارامسىز. باسىندا باسپاناسى دا جوق. اقىلى وقيتىن ستۋدەنت قىزى ەكەۋى 70 مىڭ تەڭگە مۇگەدەكتىك بويىنشا تولەماقىمەن جان باعىپ ءجۇر.
ەسكە سالا كەتەيىك, الماتىنى ءدۇر سىلكىندىرگەن وقيعا 2021 جىلدىڭ سوڭىندا بولدى. بۇرىنعى ايەلى ينديرا تەرگەۋباەۆاعا كۇن كورسەتپەگەن ەر ادام ونى جالعا العان دۇكەنىمەن قوسا ورتەپ جىبەردى. ەر ادام قيراعان عيماراتتا جان تاپسىرىپ, ينديرانى كۋاگەر امان الىپ قالدى.
