ەڭ قىمبات بانكنوت – ەڭ قۇندى پرەزيدەنت: ترامپتىڭ اقشاسى اينالىمعا شىعادى

فوتو: اشىق دەرەككوز

اقش-تا دونالد ترامپ بەينەلەنگەن جاڭا بانكنوت شىعارىلۋى مۇمكىن, دەپ حابارلايدى qandastar.kz ريا نوۆوستي اگەنتتىگىنە سىلتەمە جاساپ.

وڭتۇستىك كارولينا شتاتىنان سايلانعان رەسپۋبليكالىق كونگرەسسمەن دجو ۋيلسون اقش-تىڭ بۇرىنعى پرەزيدەنتى دونالد ترامپتىڭ بەينەسى سالىنعان 250 دوللارلىق جاڭا بانكنوت شىعارۋ تۋرالى زاڭ جوباسىن دايىنداپ جاتقانىن مالىمدەدى.

بيۋرو گراۆيروۆكا جانە باسپا قىزمەتىنە دونالد ترامپتىڭ پورترەتى بەينەلەنگەن 250 دوللارلىق بانكنوت ازىرلەۋدى تاپسىرعان زاڭ جوباسىن دايىنداپ جاتقانىمدى قۋانا حابارلايمىن, – دەپ جازدى ۋيلسون الەۋمەتتىك جەلىدە.

كونگرەسسمەن بۇل باستامانى اقش ەكونوميكاسىنا كەرى اسەرىن تيگىزگەن “بايدەنفلياتسيا” (پرەزيدەنت دجو بايدەننىڭ ساياساتى سالدارىنان تۋىنداعان ينفلياتسيا) ماسەلەسىمەن بايلانىستىردى. ونىڭ ايتۋىنشا, امەريكالىقتار قىمباتشىلىقتىڭ سالدارىنان وزىمەن بىرگە كوبىرەك قولما-قول اقشا تاسۋعا ءماجبۇر.

BAQ.KZ جازعانداي, New York Post گازەتى بۇل ۇسىنىس 1866 جىلعى زاڭعا قايشى ەكەنىن اتاپ ءوتتى. زاڭعا سايكەس, اقش ۆاليۋتاسىندا ءتىرى ادامداردىڭ بەينەسىن سالۋعا تىيىم سالىنعان. سونىمەن قاتار, 1969 جىلدان بەرى اقش-تا 100 دوللاردان جوعارى نومينالدى بانكنوتتار شىعارىلمايدى.

2024 جىلدىڭ ماۋسىمىندا اريزونا شتاتىنىڭ رەسپۋبليكالىق كونگرەسسمەنى پول گوسار دونالد ترامپ بەينەلەنگەن 500 دوللارلىق بانكنوت شىعارۋدى ۇسىنعان بولاتىن.

زاڭ جوبالارى ءالى قابىلدانعان جوق جانە تالقىلاۋ ساتىسىندا تۇر.