جاڭالىقتار
«ەڭ لاس ۆاگون»: جولاۋشى استانا-ارقالىق باعىتىنداعى پويىزدىڭ لاستىعىنا شاعىمداندى
استانا – ارقالىق باعىتىنداعى 655تد پويىزىنىڭ جولاۋشىسى پويىزدىڭ لاستىعىنا, سىنعان ەسىكتەرگە, اشىلمايتىن تەرەزەلەر مەن دارەتحانادان شىققان جاعىمسىز يىسكە شاعىمدانىپ, الەۋمەتتىك جەلىدە ۆيدەو جاريالادى. بۇل تۋرالى Qandastar.kz اقپارات پورتالى حابارلايدى.
ۆيدەو اۆتورىنىڭ ايتۋىنشا, تاڭەرتەڭ ۆاگوننىڭ ءىشى سالقىنداپ, جولاۋشىلار تەرەزەلەردى جابا الماعان. ال جولسەرىك ەشقانداي شارا قولدانباعان.
“ۆاگون لاس, ەسىكتەر جابىلمايدى, دارەتحانا ءبىر جىل جۋىلماعانداي, تەرەزەنىڭ اينەكتەرى قاپ-قارا, ىستىققا شىداۋ مۇمكىن ەمەس, كونديتسيونەر جوق. بيلەت قىمباتتادى, بىراق جاعداي جاسالماعان. سۇمدىق! ەڭ لاس ۆاگون, 13 ۆاگونعا بيلەت الماڭىزدار», – دەپ جازدى جەلى قولدانۋشىسى.
سونداي-اق ول جولسەرىكتىڭ قىزمەتىنە كوڭىلى تولمايتىنىن جەتكىزدى.
“جولسەرىك مۇلدەم جۇمىس ىستەمەيدى. نە ءۇشىن ءجۇر? قولىنا سۇلگى الىپ تىم بولماسا, 2 ساعات سايىن دارەتحانانى حلورمەن جۋىپ وتىرمايدى ما”, – دەدى ول.
جولۋشىنىڭ سىنىنا جاۋاپ رەتىندە, «جولاۋشىلار تاسىمالى» اق بۇل پويىزدىڭ جەكە مەنشىك «KazRail» جشس كومپانياسىنا تيەسىلى ەكەنىن جانە «قتج» قۇرىلىمىنا قاتىسى جوق ەكەنىن حابارلادى.
«قازاقستاندا جولاۋشىلار تاسىمالى نارىعىندا 14 جەكە كومپانيا جۇمىس ىستەيدى. ولاردىڭ قىزمەتىن كولىك مينيسترلىگى رەتتەيدى», – دەپ تۇسىندىرگەن قتج وكىلدەرى شاعىمدى تىكەلەي مينيسترلىككە جولداۋ كەرەگىن ايتتى.
كەيىنىرەك «KazRail» جشس بۇل جاعدايعا بايلانىستى پىكىر ءبىلدىرىپ, جولاۋشىدان كەشىرىم سۇرادى. كومپانيانىڭ مالىمدەۋىنشە, 13-ۆاگون دەمالىس كۇندەرىندەگى سۇرانىستىڭ ارتۋىنا بايلانىستى قوسىمشا تىركەلگەن.
«اتالعان ۆاگون رەزەرۆتە تۇرادى جانە تەك ەرەكشە جاعدايلاردا عانا پايدالانىلادى. ول كونديتسيونەرمەن جابدىقتالماعان – سەبەبى مۇنداي مۇمكىندىك ۆاگوننىڭ كونسترۋكتسياسىندا قاراستىرىلماعان. دەگەنمەن پويىزدىڭ نەگىزگى ۆاگوندارى جاڭعىرتۋدان وتكەن جانە قازىرگى تالاپتارعا ساي كەلەدى», – دەپ مالىمدەدى كومپانيا.
«KazRail» كومپانياسى سانيتارلىق ايماقتارداعى تازالىق پەن جاعىمسىز يىسكە قاتىستى قىزمەتتىك تەكسەرىس جۇرگىزىلەدى دەپ سەندىردى. جولاۋشىلارعا قىزمەت كورسەتەتىن قىزمەتكەرلەرگە – جولسەرىكتەر مەن پويىز باستىعىنا قاتاڭ تارتىپتىك شارا قولدانىلماق. سونداي-اق سانيتارلىق باقىلاۋ رەزەرۆتىك ۆاگوندارعا دا كۇشەيتىلمەك.
الەۋمەتتىك جەلىلەردە بۇل تاقىرىپتى تالقىلاۋعا وزگە دە قازاقستاندىقتار قوسىلىپ, پويىزداردىڭ جاي-كۇيىنە شاعىمداندى.
«استانا – جەزقازعان, 108-پويىز – تۋرا سونداي جاعداي”, ”جەزقازعان. ءجيى جۇرەمىن. 80% جاعدايدا سونداي ۆاگوندار. جولسەرىكتەر دە بۇرىنعىداي ەمەس…”, “مەملەكەت ءبارىن جەكەگە ساتىپ جىبەردى, باقىلاۋ جوق. ولار ءۇشىن باستىسى – پايدا, ال جاڭا ۆاگون الۋعا ەشكىم نيەتتى ەمەس”, “117–118 پاۆلودار – قىزىلوردا. جاعدايى دا سول كۇيى”, – دەپ جارىسا جازدى جەلى قولدانۋشىلارى.
