Jańalyqtar
«Eń las vagon»: Jolaýshy Astana-Arqalyq baǵytyndaǵy poıyzdyń lastyǵyna shaǵymdandy
Astana – Arqalyq baǵytyndaǵy 655TD poıyzynyń jolaýshysy poıyzdyń lastyǵyna, synǵan esikterge, ashylmaıtyn terezeler men dárethanadan shyqqan jaǵymsyz ıiske shaǵymdanyp, áleýmettik jelide vıdeo jarııalady. Bul týraly Qandastar.kz aqparat portaly habarlaıdy.
Vıdeo avtorynyń aıtýynsha, tańerteń vagonnyń ishi salqyndap, jolaýshylar terezelerdi jaba almaǵan. Al jolserik eshqandaı shara qoldanbaǵan.
“Vagon las, esikter jabylmaıdy, dárethana bir jyl jýylmaǵandaı, terezeniń áınekteri qap-qara, ystyqqa shydaý múmkin emes, kondııoner joq. Bılet qymbattady, biraq jaǵdaı jasalmaǵan. Sumdyq! Eń las vagon, 13 vagonǵa bılet almańyzdar», – dep jazdy jeli qoldanýshysy.
Sondaı-aq ol jolseriktiń qyzmetine kóńili tolmaıtynyn jetkizdi.
“Jolserik múldem jumys istemeıdi. Ne úshin júr? Qolyna súlgi alyp tym bolmasa, 2 saǵat saıyn dárethanany hlormen jýyp otyrmaıdy ma”, – dedi ol.
Jolýshynyń synyna jaýap retinde, «Jolaýshylar tasymaly» AQ bul poıyzdyń jeke menshik «KazRail» JShS kompanııasyna tıesili ekenin jáne «QTJ» qurylymyna qatysy joq ekenin habarlady.
«Qazaqstanda jolaýshylar tasymaly naryǵynda 14 jeke kompanııa jumys isteıdi. Olardyń qyzmetin kólik mınıstrligi retteıdi», – dep túsindirgen QTJ ókilderi shaǵymdy tikeleı mınıstrlikke joldaý keregin aıtty.
Keıinirek «KazRail» JShS bul jaǵdaıǵa baılanysty pikir bildirip, jolaýshydan keshirim surady. Kompanııanyń málimdeýinshe, 13-vagon demalys kúnderindegi suranystyń artýyna baılanysty qosymsha tirkelgen.
«Atalǵan vagon rezervte turady jáne tek erekshe jaǵdaılarda ǵana paıdalanylady. Ol kondııonermen jabdyqtalmaǵan – sebebi mundaı múmkindik vagonnyń konstrýkııasynda qarastyrylmaǵan. Degenmen poıyzdyń negizgi vagondary jańǵyrtýdan ótken jáne qazirgi talaptarǵa saı keledi», – dep málimdedi kompanııa.
«KazRail» kompanııasy sanıtarlyq aımaqtardaǵy tazalyq pen jaǵymsyz ıiske qatysty qyzmettik tekseris júrgiziledi dep sendirdi. Jolaýshylarǵa qyzmet kórsetetin qyzmetkerlerge – jolserikter men poıyz bastyǵyna qatań tártiptik shara qoldanylmaq. Sondaı-aq sanıtarlyq baqylaý rezervtik vagondarǵa da kúsheıtilmek.
Áleýmettik jelilerde bul taqyrypty talqylaýǵa ózge de qazaqstandyqtar qosylyp, poıyzdardyń jaı-kúıine shaǵymdandy.
«Astana – Jezqazǵan, 108-poıyz – týra sondaı jaǵdaı”, ”Jezqazǵan. Jıi júremin. 80% jaǵdaıda sondaı vagondar. Jolserikter de burynǵydaı emes…”, “Memleket bárin jekege satyp jiberdi, baqylaý joq. Olar úshin bastysy – paıda, al jańa vagon alýǵa eshkim nıetti emes”, “117–118 Pavlodar – Qyzylorda. Jaǵdaıy da sol kúıi”, – dep jarysa jazdy jeli qoldanýshylary.
