«ەڭ سوراقى اقيقات»: ءانارۋدىڭ ادۆوكاتى جانقوشتىڭ ەسىرتكىگە تاۋەلدى ەكەنىن ايتتى

فوتو: instagram.com/zhankoshturarov

ءانارۋ قۇرمانالىنىڭ ادۆوكاتى ءلاززات احاتوۆا كاسىپقوي بوكسشىعا اۋىر ايىپتار تاقتى. جاڭقوش تۇراروۆقا قاتىستى قىلمىستىق ءىستىڭ قىسقارتىلىپ قالعانىمەن زاڭگەر دە, ءانارۋ دا كەلىسپەيدى. ەندى جابىرلەنۋشى تاراپ ءىستى قىسقارتقان تەرگەۋشىلەردىڭ ۇستىنەن دە, بوكسشىنىڭ ايەلىنە قاتىستى دا ارىزدانباق, دەپ حابارلايدى  qandastar.kz Skifnews.kz اقپارات پورتالىنا سىلتەمە جاساپ.

احاتوۆا تەرگەۋ ورگاندارىنىڭ زاڭسىز ارەكەتتەرىن اشىپ جازدى.

«ءىستى بىزگە ايتپاي, زاڭسىز قىسقارتقانىن ەكى كۇن بۇرىن, قويماي ءجۇرىپ بىلدىك. ەندى تەرگەۋ ورگانى ءبىزدى سوتقا شاعىمدانباسىن دەپ, قاۋلىنى بەرمەي وتىر! ول قاۋلىعا شاعىمداناتىن قۇقىعىمىز بار! قايتا جاڭعىرتۋعا قۇقىعىمىز بار. سولاي جاسايمىز دا. ءتيىستى ورگانداردىڭ بارىنە شاعىمدانامىز. پوليتسيا ءىستى زاڭسىز قىسقارتسا, نەگە ونى تۇپكىلىكتى شەشىم دەپ ويلايدى, كەي كىسىلەر? ول شەشىمدەرىنە  شاعىم كەلتىرۋ قۇقىعى بار ەمەس پە? سوت بار, پروكۋراتۋرا بار. ءيا, جانقوش تۇراروۆتىڭ “كرىشاسى” تۋرالى, تەرگەۋدەگى ورەسكەل زاڭسىزدىقتار تۋرالى ءىس قوزعالعان ساتتە جازعان ەدىك. كۇدىگىمىز راستالدى. پوليتسيا بۇعان دەيىن دە تۇراروۆتىڭ  بىرنەشە  ءىسىن  قىسقارتقان ەكەن. ولار باسىنان -اق ءىستى جاۋىپ تاستاۋعا, ءانارۋدىڭ اۋزىن جاۋىپ تاستاۋعا بارىنشا كۇش سالعان بولاتىن», — دەپ جازدى ءلاززات احاتوۆا.

ونىڭ سوزىنشە, وسىعان دەيىن تەرگەۋ قۇپياسىنا كەدەرگى كەلتىرمەس ءۇشىن كوپ دۇنيەنى جازباي كەلگەن.  باسپاسوز كونفەرەنتسياسىن دا وتكىزبەي, سۇقبات تا بەرمەگەن.

«باسىندا قوعام قىزدىڭ ارەكەتىن تۇسىنبەي, ءانارۋدى كىنالاپ كەتكەن سوڭ, پوليتسيانىڭ ۇرىپ-سوققانى تۋرالى, بوكسەردىڭ  ايەلى جالعان اقپار تاراتىپ, “تۇندە زۆوندايدى” دەپ, جاريالاعان سوڭ, ءتۇسىندىرۋ ماقساتىندا ءبىراز جازعانىمدى بىلەسىزدەر. شەت جاعاسىن عانا. اقىرى تەرگەۋدىڭ ءوزى وسىلاي زاڭدى بەلدەن باسىپ وتىرسا, ءمان-جايدى اشىق ايتايىن:

ءانارۋ ەشكىمگە جالا جاپقان جوق! ونى تۇراروۆ و باستا الداپ, قۇرىعىنا ءتۇسىرىپ, ەسىن بىلمەي جاتقاندا زورلاپ, التى جىل بوپسالاپ كەلگەن! تۋىستارىنا, تانىستارىنا ابىرويسىز بولۋدان قورىققاندىقتان, قىز بالا امالسىز ونىڭ دەگەنىنە كونىپ كەلگەن.

ەڭ سوراقىسى — وسى ۋاقىتقا دەيىن ايتىلماي كەلە جاتقان اقيقات — تۇراروۆ ءوزى مەفەدرون قولدانعانىمەن قويماي(ونىڭ ەسىرتكىگە اۋەس ەكەنىن تانىستارى تۇگەل بىلەدى ەكەن) ءانارۋدى دا مەفەدرونعا تاۋەلدى ەتىپ قويعان! بۇل تۋرالى  ارىز بەرگەندە دە, بەتتەستىرۋ كەزىندە دە, جاۋاپ الۋ كەزىندە دە ءانارۋ ايتقان. ءىس ماتەريالدارىندا ول دەرەكتەر بار. الايدا تەرگەۋ ورگانى سول كەزدە ەكەۋىنىڭ دە قاندارىن تەكسەرۋگە ساراپتاماعا جىبەرۋ كەرەك ەدى. ونى جاساماعان! ياعني تەرگەۋ ورگانى قىلمىستى جاسىرعان! سونىڭ سالدارىنان ەكى اي وتكەن سوڭ, ءبىز ەسىرتكى تۋرالى زەرتتەۋدى تالاپ ەتىپ, ارىزدانىپ, قويماعاسىن, تۇراروۆ جاقىندا “قانىندا ەسىرتكى جوق” دەگەن انىقتاما اپارىپ بەرىپتى) تامىزدا قولدانعان ەسىرتكى قاننان قازان ايىندا دەيىن ارينە كورىنبەيدى. ويتكەنى, ساراپشىلاردىڭ ايتۋىنشا, ەكى كۇننەن كەيىن دە قاننان كورىنبەيتىن قىمبات تۇرلەرى بار ەكەن, مەفتىڭ», — دەدى زاڭگەر.

ونىڭ پىكىرىنشە, پوليتسيا قىلمىستىق كودەكستىڭ 120-بابى ەمەس, 121-بابىمەن ءىس قوزعاۋ كەرەك ەدى. ول باپتىڭ جازاسى اۋىرلاۋ. دالەلدەۋ — بولەك اڭگىمە, ارىزدا انىق جازىلعان نارسەنى بۇرمالاپ, ءىستى ادەيى جەڭىلدەۋ باپپەن قوزعاعان. سودان كەيىن, ساراپتامانى بىرنەشە كۇننەن كەيىن عانا تاعايىنداعان. سونىمەن قاتار, ساراپتامانى پروكتولوگ دارىگەردىڭ قاتىسۋىنسىز جاساعان! ياعني سىرتىن عانا تەكسەرىپ, ءىشىن تەكسەرمەگەن. ول دا قىلمىستى جاسىرۋ دەپ ەسەپتەلەدى!

«تاۋەلسىز ساراپشى تاحير حاليمنازاروۆتىڭ ايتۋىنشا, ۋاقىت وتكەن سايىن, جارا جازىلا باستايدى دا, زورلىق بەلگىسىن انىقتاۋ قيىنعا سوعادى..تەرگەۋ ورگانىنىڭ ارەكەتى دە وسىنداي ناتيجە بولۋ ءۇشىن بولۋعا ادەيى جاسالعانعا ۇقسايدى. مەن ارىز 20 كۇن كەيىن باردىم. سوعان دەيىن ءانارۋدىڭ قورعاۋشىسى, قۇقىقتىق باعىت كورسەتەتىن ادام بولماعان. سونى پايدالانىپ, بوكسەردىڭ قىلمىسىن جاسىرۋ ماقساتىندا تالاي زاڭسىزدىق جاسالعان. ساراپتاما قورىتىندىسىمەن ءانارۋدىڭ بىرنەشە دەنە جاراقاتتارىنىڭ بولعانى راستالىپ  وتىر. كەش بارسا دا, سول كەزدە كۇشپەن تۇسىرگەن جاراقاتتارى كەتپەگەن ەكەن. بۇلار زورلىق بەلگىسى ەمەي, نەمەنە سوندا? بىزگە تەرگەۋ ورگانى ءىستى قىسقارتۋ تۋرالى قاۋلىنى بەرگەن جوق! تانىستىرعان دا جوق! ياعني قىلمىستىق زاڭ نورمالارىن بەلدەن باسىپ وتىر. سولاي بولا تۇرا, قىسقارتتىق دەپ, كىناسى دالەلدەنبەدى دەپ, سايتتارعا اقپارات بەرىپ وتىر. جابىرلەنۋشى تاراپتىڭ ىسپەن تانىسۋ, شاعىم بەرۋ قۇقىعى قايدا قالدى, سوندا?! مىنا زاڭسىزدىقتار قاشانعا دەيىن جالعاسادى?!», — دەدى جابىرلەنۋشىنىڭ قورعاۋشىسى.

زاڭگەر باس پروكۋراتۋرا مەن سوتقا تەرگەۋشىلەردىڭ ۇستىنەن شاعىم تۇسىرمەك. ونىمەن قوسا, جاڭا باپتارمەن تاعى دا ارىز جازىلادى. تەرگەۋ ورگانىنىڭ ۇستىنەن قىلمىستىق كودەكستىڭ 433-بابىمەن, ياعني قىلمىستى قاساقانا جاسىرۋ بويىنشا ارىز جازىپ, جانقوش تۇراروۆتىڭ ايەلىنىڭ ۇستىنەن باق بەتتەرىندە جالعان اقپارات تاراتىپ, ادامنىڭ ار-نامىسىنا نۇقسان كەلتىرگەنى ءۇشىن دە ارىز جازاتىندارىن مالىمدەدى.