ەڭبەك ءمينيسترى كەلەسى جىلى زەينەتاقى مەن جاردەماقىلار قانشاعا وسەتىنىن ايتتى

فوتو: pixabay.com

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا زەينەتاقى مەن جاردەماقىنى وسىرۋگە قاتىستى سۇراققا جاۋاپ بەردى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

ءمينيستردىڭ ايتۋىنشا, 2026 جىلدىڭ بيۋدجەتىندە زەينەتاقى مەن الەۋمەتتىك تولەمدەردى ارتتىرۋعا 622 ميلليارد تەڭگەدەن استام قارجى قاراستىرىلعان. ولاردى 10 پايىزعا دەيىن ۇلعايتۋ جوسپارلانعان, بۇل بولجامدى ينفلياتسيا دەڭگەيىنە سايكەس كەلەدى, قازىر ول 10,5 پايىزعا تەڭ.

«زەينەتاقى تولەمدەرىن الاتىنداردىڭ بارلىعىنىڭ دەرلىك زەينەتاقىسى وسەدى: بۇل ىنتىماقتى زەينەتاقى, بازالىق زەينەتاقى. سونداي-اق مۇگەدەكتىك بويىنشا بەرىلەتىن تولەمدەر: مۇگەدەكتىگى بار ادامدارعا, مۇگەدەكتىگى بار بالالارعا جانە ولاردى باعىپ وتىرعان اتا-انالارعا بەرىلەتىن جاردەماقىلار, اسىراۋشىسىنان ايىرىلۋ بويىنشا جاردەماقىلار وسەدى. نەگىزگى بازالىق كورسەتكىشتەر كوتەرىلەدى», — دەپ سەندىردى سۆەتلانا جاقىپوۆا.

مينيستر زەينەتاقى مەن جاردەماقىلار 2026 جىلعى 1 قاڭتاردان باستاپ وسەتىنىن ناقتىلادى.

ايتا كەتەيىك, بۇگىندە ەلىمىزدە بازالىق زەينەتاقىنىڭ ەڭ تومەن مولشەرى 32 360 تەڭگە بولسا, كەلەر جىلى 35 596 تەڭگەگە ۇلعايۋى مۇمكىن, ال بازالىق زەينەتاقىنىڭ ەڭ جوعارى مولشەرى بيىل 50 851 تەڭگە بولسا, كەلەسى جىلى 5 مىڭ تەڭگەدەي قوسىلىپ, 55 936 تەڭگە بولۋى مۇمكىن.

سونداي-اق مينيستر كەلەسى جىلى ەڭ تومەنگى جالاقى مولشەرى دە وسۋى مۇمكىن ەكەنىن ايتتى. قازىر ەلىمىزدە ەڭ تومەنگى جالاقى – 85 مىڭ تەڭگە.