“Endi aıtýǵa bolady”. Muhamedjan Tazabek Nazarbaev jaıly el estimegen esteligin bólisti

Aıtysker aqyn Muhamedjan Tazabek Nursultan Nazarbaevtyń týǵan kúninde jelide jazba jarııalap, el estimegen esteligin bólisti, dep habarlaıdy Qandastar.kz.

“Búgin “Astana kúni” “Dombyra merekesimen” sáıkes kep jatyr. Ári Tuńǵysh prezıdenttiń 85 ke kelgen mereıtoıy da mejesine kelip tur eken…

Úsh qundylyqtyń basy birikken bir jazbammen bóliseıin.
Astanany salǵan atqaminerlermen Elbasynyń mereıli kúninde qolyma dombyra alyp bir jyrlaǵanym bar edi…

Bul oqıǵa 2010 jyly, shildeniń basynda Elbasy rezıdenııasynda oryn alǵan edi. Qolyma dombyra alǵanǵa deıin de, dombyradan keıin de biraz áńgime bar. Ony tolyqtaı oqyǵysy kelgen kisi “Endi aıtýǵa bolady” kitabyn paraqtap shyqsa bolady. Mynaý sol otyrystyń bir sáti bolatyn…

“Jaǵympazdyq pa, janashyrlyq pa?
Astarlap aıtylǵan arnaý…

Otyrystaǵy resmı áńgime saıabyrsı bergende qolyma dombyra aldym. Qaǵyp jibergende bári eleń ete qaldy.
Elbasy: ”Al, sen eń bastysy aıtysker aqynsyń ǵoı, kınoda Jambyl atańnyń da rolin somdadyń. Qane, sýyryp sap, myna aǵalaryńa birdeńe deshi” dep, meni qamshylaı sóıledi…

Qarasam qarsy aldymda sol kezdegi mam.hatshy Qanat Saýdabaev otyr eken.

Men:
”Nur, aǵa, myna otyrǵan Qanat aǵam,
Qanat dep, atyn qalaı dál ataǵan.
Qanat bop, oń-solyńnan kótermelep,
Osyndaı uldar júrsin ár atadan!”

“Qanekeń epti týǵan er ispetti,
Bul jolda myqtylarǵa berispepti!
Shırek ǵasyr shaýyp júr qasyńyzda,
Tulǵa eken sharshatpaıtyn tonýs tekti.
О́zin kórsem suraıyn dep júr edim,
Qaneke ataǵyńyz alys ketti.
AQSh qa elshi bolyp barǵan kezde,
Qyzyǵyń kóp, jasardaı konspekti.
Kondolıza Raıspen kezdeskende,
Tyń áser qaldyratyn shans bopty.
“My sister” dep aldynan bılep shyǵyp,
Tań qalyp, solaı sizben tanys bopty.
Aıtpaqshy, aıtyńyzshy, biz de estidik,
AQShta qazaq úshin san is bopty.
Qalaısha ohotaǵa ap shyqtyńyz,
Qorǵanys mınıstri Ramsfeldti?!”-dep, ol kútpegen, biraq ózim biletin erekshe qyrynan jyrǵa qosyp jiberip, Qanekeń qýanǵanǵan orynan turyp ketti.

“Nureke, Siz tapsyrsańyz boldy ǵoı, el úshin, memleket úshin jyrtyp ótem ǵoı” dep ózine tán aq kóńildikpen,
(bir kezde mádenıet mınıstri bolǵan)
ártistigi ustap, arqasy qozyp ketti me, túımelerin byrt-byrt etip úzip, kóıleginiń jaǵasyn eki qolmen ustap, eki jaqqa qaq aıyrdy…

Talaı jerde taýyp aıttyq qoı, biraq, sózdiń sońy dál mynadaı effektige ulaspaǵan eken. Qýanarymdy da, qýanbasymdy bilmeı qaldym. Elbasy da ańtarylyp, ne tolqyǵany, ne shalqyǵany belgisiz, álgi “berilgendikke” sendi me, senbedi me, ol da belgisiz, basyn shaıqap, kózin oınaqshyta Qanekeńe qarap qaldy…

Tórt-bes sátti shýmaqtan keıin Aslan Mýsınge qaraı buryldym. “Maǵan ne aıtar eken” degendeı, synaı qarap, syǵalaı kúlip otyr eken.

“Asekeń ózińizge bel baladaı,
El basqaryp júr búgin er danadaı!
Basshysyna qosshy bop berilmese,
Bıikke ornyǵady pende qalaı?
Aseke, siz jaıynda bir áńgime,
Estidim, ras pa eken, beý, ǵalam-aı!
Elbasy Aqtóbege kelgen kezde,
At minip shyǵypsyzdar belge qaraı?
Zýyldap, shapqan kezde Nur aǵanyń,
Tulpary súringen be, álde qalaı?
Er aýyp, tartpa úzilip, taqym bosap,
Qulaýǵa bet alypty ońǵa qaraı…
Sol kezde at ústinen siz sekirip,
Jantalasa qulapsyz jerge qaraı.
Elbasyny tıgizbeı topyraqqa,
Qushaqtap, ap qalypsyz keń daladaı.
Estidim osyndaı bir áńgimeni,
Mundaı sóz tarqamasyn elge qalaı?!
Basshynyń qaterine basyn tikken,
Boldyńyz jartastaǵy ór qaraǵaı!
Nur aǵań qadirińdi bilip, sosyn:
“Aman júr, degen shyǵar, sen de, davaı!”

Osyndaı shýmaqtardan bes-altaýyn tógip-tógip jiberip em, Asekeń aǵamnyń júzi jibip, júregi jumsaryp sala berdi. Sýretke túsýden qashqaqtaıtyn
“seryı kardınal” oń jaǵymyzǵa kep, ortamyzdan oryn aldy.
Sózge toqtaǵan halyqpyz ǵoı. Odan keıin Aslan Mýsınniń de, Qanat aǵanyń da tek qana aǵalyǵyn kórdik. “Bet kórse júz uıalady” deıdi ǵoı. Betpe-bet sóılesip, ashyq áńgimemen aqtarylyp alǵanǵa ne jetsin?!
Sol keshti oılana júrip oraılastyryp, belden baspaı, júzdestirip otyryp júzege asyryp jibergen Elbasynyń da bir danalyǵy shyǵar?!

Qansha degenmen kópti kórgen, álemdik alpaýyttarmen arbasyp, otbasynyń da otyna shyjǵyrylyp, taý asyp, tas basqan kúrdeli tulǵa ǵoı. Onyń kórgenin kórmegesin, onyń jolymen júrmegesin, onyń etigin kımegesin aýzymyz jyldam aıta beremiz. Alla artyq sózderimiz úshin bizderdi keshirsin!
(“Endi aıtýǵa bolady” kitabynan úzindi)

Et pen tyrnaqtaı bólinbeıtin qundylyqtar bolady. Nur aǵa táýelsiz Qazaqstan úshin sondaı tulǵa. Ketken keler, kemis tolar. Sý aǵar, tas qalar. Baran degenimiz qylań bop shyǵar, shyndyq degenimiz kúmán bop shyǵar. Ne bolmaı jatyr?! Nege tań qalmadyq?!Tarıh tarazysy ádil!
Árkimdi óz satysyna qoıar…

Prezıdentimiz Toqaevtyń ynsappen aıtqan quttyqtaý haty — altyn ortasy, ádil baǵasy.
Astana ajarlanyp, El aǵalary din aman bop, beıbit kúnimiz dombyra kúmbirimen saltanatqa bólene bersin!”, — dep jazdy Muhamedjan Tazabek.