Endi án urlaǵandar 6 jylǵa sottalýy múmkin

Foto: ashyq derekkóz

Elimizde bireýdiń ánin ruqsatsyz oryndaǵandarǵa 300 myń teńgege deıin aıyppul salynyp, 6 jylǵa deıin bas bostandyǵynan aıyrylady, dep habarlady Ulysmedia.kz 31 arnaǵa silteme jasap.

Ádilet mınıstrligi avtorlyq quqyqqa qatysty ákimshilik jaýapkershilik engizýdi qarastyryp jatyr.

Jańa zań jobasynda avtordyń kez kelgen týyndysyn ruqsatsyz alyp, óz maqsatyna paıdalanatyndarǵa jazany kúsheıtý qarastyrylǵan. Bul bastamamen kompozıtor Ázız Baltabekuly da qoldap otyr.

Bizde kóp jaǵdaıda ánderdi ruqsatsyz alady. Tipti, kaver bolǵan kúnniń ózinde avtordan bir aýyz ruqsatyn alý kerek. TikTok-qa jaı shyǵara saldyq qoı degen sııaqty júrdim-bardym qaraýǵa bolmaıdy, – deıdi kompozıtor.

Meıramhanalar men karaokede oryndaýshy belgili bir avtordyń týyndysyn shyrqaý úshin mindetti túrde ujymdyq uıymdarmen shart jasasýǵa tıis. Shartqa sáıkes, shyǵarma ıesine aı saıyn syıaqy berý mindetteledi.

Ádilet mınıstrligi Zııatkerlik menshik quqyǵy departamentiniń bas sarapshysy Botagóz Satjanovanyń aıtýynsha jańa zań jobasy ázirge pysyqtalyp jatyr.