Endi bakalavr stýdentteri «Bolashaq» baǵdarlamasy boıynsha shetelde bilim ala alady

Foto: ashyq derekkóz

Ǵylym jáne joǵary bilim mınıstri Saıasat Nurbek endi bakalavr stýdentteriniń «Bolashaq» baǵdarlamasy boıynsha shetelde oqı alatynyn málimdedi. Bul týraly Stan.kz aqparat agenttigi habarlaıdy.

Bul sheshimdi ótken jyly respýblıkalyq komıssııa qabyldaǵan. Sheshim bilim týraly zańnyń bir bóligine ózgerister engizýdi talap etedi.

«Biz ótken jyldyń aıaǵynda parlamentke tıisti zań jobasyn usyndyq. Depýtattar qoldap, óz usynystaryn aıtty. Túzetýlermen kelistik. Úkimet otyrysynan keıin bul qorytyndy parlamentke qaıtaryldy. Jańa sessııa bastalǵan kezde belsendi túrde qosylamyz. Osy jyly qabyldanady. «Bolashaq» baǵdarlamasyndaǵy «bakalavr» sanatyn osylaı qalpyna keltiremiz», – dedi Nurbek.

Baǵdarlama halyqaralyq olımpıadalar men ǵylymı jarystarda júldeli oryndarǵa ıe bolǵan úzdik túlekterge grant beredi. Bul jarystardyń tizimin Respýblıkalyq komıssııa retteıtin bolady

Álemniń úzdik ýnıversıtetterine óz bilimimen túsken mektep oqýshylary da baǵdarlamaǵa qatysa alady.

Aıta keteıik, buǵan deıin 2024 jyly «Aýyl sharýashylyǵy jáne bıoresýrstar» jáne «Veterınarııa» bilim berý salasy boıynsha shekti ball ózgergeni týraly jazǵan edik.