ەندى ەلىمىزدە كىر ماشيناسى مەن شاڭسورعىشتان شىققان دىبىس ءۇشىن ايىپپۇل سالىنباق

فوتو: freepik.com

ەندى قازاقستاندىقتارعا كەشكى ۋاقىتتا كىر ماشيناسى مەن شاڭسورعىشتان شىققان دىبىس ءۇشىن ايىپپۇل سالىنۋى مۇمكىن, دەپ جازدى qandastar.kz

بۇل تۋرالى Stan.kz اقپارات اگەنتتىگى ينفورمبيۋروباعدارلاماسىنا سىلتەمە جاساپ حابارلايدى.

ماسەلەن, شاڭسورعىشتىڭ داۋسى شامامەن 70 دەتسيبەلگە تەڭ. ال ەلدە «تىنىشتىق ساعاتى» تۋرالى زاڭ بار. وعان سايكەس, كەشكى 22:00-دەن كەيىن شاڭسورعىش قوسۋعا بولمايدى. ايتپەسە, 30 مىڭ تەڭگەگە جۋىق ايىپپۇل تولەۋىڭىزگە تۋرا كەلەدى.

سانيتارلىق نورمالارعا سايكەس, كۇندىزگى ۋاقىتتا رۇقسات ەتىلگەن شۋدىڭ دەڭگەيى – 55 دەتسيبەل. ال تۇندە ءارى «تىنىشتىق ساعاتىندا» – 40 دەتسيبەلدەن اسپاۋى ءتيىس.

«كودەكستىڭ نەگىزگى تالابى بويىنشا جۇمىس كۇندەرى كەشكى 22:00-دەن تاڭعى 9:00-گە دەيىن, ال دەمالىس جانە مەرەكە كۇندەرى 23:00-دەن 10:00-گە دەيىن تىنىشتىقتى بۇزۋعا جول بەرىلمەيدى. ەڭ ءجيى شاعىم تۇسەتىن جاعداي قۇرىلىس الاڭدارىنان شىققان شۋ», – دەدى الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتىنىڭ كوممۋنالدىق نىسانداردى باقىلاۋ ءبولىمىنىڭ باسشىسى: گۇلجان قيلىباەۆا.

الماتىدا جىل باسىنان بەرى تىنىشتىقتى بۇزعانى ءۇشىن 550-دەن استام ادامعا ايىپپۇل ارقالاعان. العاش رەت ءتارتىپ بۇزعاندارعا ون ايلىق ەسەپتىك كورسەتكىش (شامامەن 40 مىڭ تەڭگە) كولەمىندە ايىپپۇل قاراستىرىلعان. ەگەر ءبىر جىل ىشىندە وقيعا قايتالانسا, سوما ەكى ەسەگە ءوسىپ, جيىرما ايلىق ەسەپتىك كورسەتكىشكە جەتەدى. دەگەنمەن جۇرگىزىلىپ جاتقان الدىن الۋ شارالارىنا قاراماستان, قۇقىق بۇزۋشىلاردىڭ سانى ءالى دە جوعارى بولىپ وتىر.

«قازاقستاننىڭ اكىمشىلىك كودەكسىندە 437-باپ تىنىشتىقتى بۇزۋ تۋرالى نورما بار. زاڭ بويىنشا بارلىق داڭعازا جوندەۋ جۇمىستارى, قاتتى مۋزىكا جانە ازاماتتاردىڭ تىنىشتىعىن بۇزاتىن كەز كەلگەن ارەكەتكە تىيىم سالىنادى ءارى ول زاڭعا قايشى سانالادى», – دەلىنگەن پوليتسيا حابارلاماسىندا.

بارلىق كورشىلەر بىردەن ۋچاسكەلىك پوليتسياعا شاعىمدانا بەرمەيدى. ادەتتە داۋ-جانجالدار تۇرعىندار چاتىندا شەشىلەدى. دەگەنمەن ەرەجەلەردى ءبىلىپ, ولاردى بۇزباعان دۇرىس.