ەندى قازاقستاندىقتار تەمىر جول بيلەتىن قايتارعانى ءۇشىن ايىپپۇل تولەمەيدى

28 تامىزدان باستاپ قازاقستانداعى جولاۋشىلار پويىزىنىڭ بيلەتىن قايتارۋداعى ايىپپۇل الىنىپ تاستالدى, دەپ حابارلايدى قازاقپارات ءتىلشىسى. بۇل تۋرالى «جولاۋشىلار تاسىمالى» اق اتقارۋشى ديرەكتورى ەدىگە مىحانوۆ «قازاقستان تەمىر جولى» اق باس عيماراتىندا وتكەن ءباسپاسوز ءماسليحاتىندا ايتتى. «جاڭا ەرەجەلەرگە سايكەس, جولاۋشىنىڭ جول ءجۇرۋ بيلەتىن قايتارعانى ءۇشىن تولەنەتىن 1000 تەڭگەنى قۇرايتىن ايىپپۇل الىنىپ تاستالدى. بۇل نورما الىپساتارلاردىڭ جاپپاي بيلەت وتكىز جاعدايلارىن تومەندەتۋگە مۇمكىندىك بەرەدى», — دەدى ەدىگە مىحانوۆ. سونىمەن بىرگە, زاڭدى تۇلعالاردىڭ توپتىق تاپسىرىس بەرۋىندە قايتارىلمايتىن دەپوزيت كولەمى جالپى جول ءجۇرۋ قۇنىنىڭ 30% قۇراماق. «بۇعان دەيىن زاڭدى تۇلعالاردىڭ ءبىر ورىندى رەزەرۆكە قويۋىنا 290 تەڭگە الىناتىن. كەمىندە 10 ادامعا توپتىق بيلەت الۋدا زاڭدى تۇلعا جول جۇرۋگە 6 كۇن قالعانشا ءتىزىمنىڭ تەڭ جارتىسىنا دەيىن وزگەرىس ەنگىزە الادى. ءبىر تاۋلىك قالعانشا بيلەتتى وتكىزسە — تولىق قۇنى قايتارىلادى. ءبىر تاۋلىكتەن ازىراق ۋاقىت قالسا — 30 پايىزى, 6 ساعاتتان كەم ۋاقىت قالسا — 50 پايىزى ۇستالادى», — دەدى ول. ودان بولەك, زاڭدى تۇلعالار تاپسىرىستى ەلەكتروندىق تسيفرلىق قولتاڭبا بويىنشا راسىمدەي الادى. بيلەت بۇرىنعىداي ءبىر بلانكادا ەمەس, ءاربىر جولاۋشىعا بولەك بەرىلەدى. ايتا كەتەيىك, 2019 جىلدىڭ 28 تامىزىندا قر يندۋستريا جانە ينفراقۇرىلىمدىق دامۋ مينيسترلىگىنىڭ جولاۋشىلار تاسىمالى, قول جۇكتەرى مەن پوشا جونەلتىمدەرى ەرەجەلەرىنە ەنگىزىلگەن وزگەرىستەر ءوز كۇشىنە ەنەدى. جاڭا ەرەجەگە سايكەس, پويىز ىشىندە شىلىم شەگۋگە تىيىم سالىندى.

دەرەككوز: https://www.inform.kz/kz/endi-kazakstandyktar-temir-zhol-biletin-kaytargany-ushin-ayyppul-tolemeydi_a3558461