ەندى كولىك نومىرىنە ادام ەسىمىن جازۋعا رۇقسات بەرىلمەك

وزبەكستان ۇكىمەتى 2025 جىلدىڭ 4 قىركۇيەگىندە №562 قاۋلى قابىلداپ, اۆتوموبيل نومىرلەرىندە ەسىمدەر مەن سوزدەردى قولدانۋعا رۇقسات بەردى. زاڭ 2026 جىلدىڭ 1 قاڭتارىنان باستاپ كۇشىنە ەنەدى. بۇل تۋرالى Qandastar.kz UzA باسىلىمىنا سىلتەمە جاساپ حابارلايدى.

مەملەكەتتىك ۋنيتارلىق كومپانيا «Uzavtomotobelgi» ەندى بىرەگەي نومىرلەردى ساتۋعا قۇقىلى بولادى. نومىردەر ەڭ كوپ دەگەندە التى ءارىپ پەن (نەمەسە) تسيفرادان تۇراتىن كومبيناتسيالاردان قۇرالىپ, اشىق ەلەكتروندى اۋكتسيوندارعا قويىلادى.

سونىمەن بىرگە, كومبيناتسيالار بۇرىننان بار نومىرلەردى قايتالاماۋى, زاڭنامانى بۇزباۋى جانە قورلايتىن سوزدەردى قامتىماۋى ءتيىس.

كەلەسى جىلدان باستاپ وزبەكستان ەلىنىڭ جولدارىندا «SARVAR», «AZIZA», «ODIL» نەمەسە «BUXORO» سەكىلدى ءنومىرلى كولىكتەردى كورۋگە بولادى.

2023 جىلدىڭ شىلدە ايىندا تسيفرلىق دامۋ ءمينيسترى باعدات مۋسين قازاقستان «مەملەكەتتىك نومىرلەر كونسترۋكتورى» قىزمەتىن ىسكە قوسۋعا دايىندالىپ جاتقانىن حابارلاعان ەدى. بۇل قىزمەت ارقىلى كولىك يەلەرى وزدەرى قالاعان ارىپتىك تاڭبالاردى تاڭداي الادى.

قازىرگى كەزدە eGov پورتالى مەن eGov Mobile قوسىمشاسى ارقىلى قايتالاناتىن ساندارى بار (اينا) نومىرلەردى تاپسىرىس بەرۋگە بولادى. بىراق ءمينيستردىڭ ايتۋىنشا, ودان دا ىڭعايلى ءارى ەركىن سەرۆيسكە سۇرانىس ارتىپ كەلەدى.

«مۇنداي فۋنكتسيا ارقىلى كليەنت نومىرگە كەز كەلگەن ارىپتەردى تاڭداپ جازا الادى. ماسەلەن, ءوز اتىنىڭ العاشقى ءۇش ءارپىن. بۇل قىزمەتكە سۇرانىس بىزدە وتە جوعارى», – دەپ جازدى سول كەزدە مۋسين Telegram پاراقشاسىندا.

قىزمەتتى ىسكە اسىرۋ ءۇشىن زاڭنامالىق تۇرعىدان سۇرانىسى جوعارى نومىرلەردىڭ ءتىزىمىن كەڭەيتۋ قاجەت.

الايدا بۇل يدەيا بۇعان دەيىن دە كوتەرىلگەن. ماسەلەن, 2018 جىلى ءماجىلىس دەپۋتاتى ومارحان وكسىكباەۆ اۆتوكولىك نومىرلەرىنە يەسىنىڭ اتىن جازۋعا رۇقسات بەرۋ تۋرالى ۇسىنىس جاساعان. ول كەزدە ىشكى ىستەر مينيسترلىگى مۇنداي باستاما قاراستىرىلماعانىن ايتقان ەدى.