جاڭالىقتار
ەندى قىلمىسكەرلەردى ۇستاۋعا كومەكتەسكەن قازاقستاندىقتار ماراپاتتالادى
فوتو: Pixabay.com
قىلمىسكەرلەردى ۇستاۋعا كومەكتەسكەن ازاماتتار ماراپاتتالادى. ولار العىس حاتپەن, باعالى سىيلىقپەن نەمەسە اقشالاي سىياقىمەن ىنتالاندىرىلادى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
ەندى كوشەدە كۇدىكتى ارەكەتتى بايقاپ, دەر كەزىندە پوليتسياعا حابارلاعان كەز كەلگەن تۇرعىن سىيلىققا يە بولۋى مۇمكىن. بۇل – جاڭا زاڭ جوباسىندا جازىلعان باستاما. وسى ارقىلى قۇقىقبۇزۋشىلىقتىڭ الدىن الماق.
بۇرىن ءتارتىپتى ساقتاۋ تەك پوليتسيانىڭ قۇزىرىندا بولسا, ەندى بۇل ىسكە مەكتەپ, اۋرۋحانا, بۇقارالىق اقپارات قۇرالدارىنىڭ قىزمەتكەرلەرى دە تارتىلادى. قاراپايىم ازاماتتار دا قوعامدىق كومەكشى بولا الادى. ولار كوشەدەگى ءتارتىپتى باقىلاپ, ءتۇسىندىرۋ جۇمىستارىن جۇرگىزەدى. سونداي-اق قۇقىقبۇزۋشىلىققا بەيىم ازاماتتاردى انىقتاۋعا كومەكتەسەدى.
ماراپاتتاۋ ءراسىمى ءۇشىن اكىمدىكتەر جانىنان ارنايى كوميسسيالار قۇرىلماق. ولار ۇمىتكەرلەردى ىرىكتەپ, سىياقىنى تابىستاۋ ىسىمەن اينالىسادى. الايدا قوعامدىق كومەكشىلەرگە تۇراقتى جالاقى قاراستىرىلماعان.
«قوعامدىق كومەكشىلەرگە ەشقانداي جالاقى تولەنبەيدى. زاڭ جوباسىندا بۇل ناقتى كورسەتىلگەن. تەك سىياقى قاراستىرىلعان. اۋداندىق ءماسليحاتتار جانىنان ارنايى كوميسسيالار جۇمىس ىستەيدى. ىشكى ىستەر مينيسترلىگى تۇراقتى تۇردە كومەكتەسكەن ازاماتتاردىڭ ءتىزىمىن كوميسسيا مۇشەلەرىنە جولدايدى. ال سىياقىنىڭ مولشەرى مەن بەرىلۋ جيىلىگىن جەرگىلىكتى اتقارۋشى ورگاندار انىقتايدى. مىسالى, اكىمدىك توقسانىنا ءبىر رەت سىياقى بەرۋ تۋرالى شەشىم قابىلداي الادى. بىراق تۇراقتى جالاقى قاراستىرىلمايدى”, – دەدى ىشكى ىستەر ءمينيسترىنىڭ ورىنباسارى يگور لەپەحا.
