ەندى لەگيونەرلەرگە بيۋدجەتتەن اقشا بولىنبەيتىن بولدى

كوللاج inbusiness.kz

لەگيونەرلەرگە اقشا تولەۋگە جول بەرمەيتىن زاڭدىق نورمانى ۇكىمەت قولدادى. بۇل تۋرالى ءماجىلىس دەپۋتاتى نارتاي ارالباي ۇلى Instagram جەلىسىندەگى رەسمي پاراقشاسىندا ايتتى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.

ونىڭ ايتۋىنشا, ادام ەستىمەگەن سپورت تۇرلەرىنە اقشا بەرىپ كەلگەن مينيسترلىكتىڭ شەشىمى دە توقتاتىلدى. 180 سپورت ءتۇرى قىسقارتىلادى. ءتيىستى نورمانى ۇكىمەت قولدادى.

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت, سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ 49 بابى:

ءبىرىنشى بولىگى: «قازاقستان رەسپۋبليكاسىنىڭ ازاماتتارى بولىپ تابىلمايتىن سپورتشىلاردى بيۋدجەت قاراجاتى ەسەبىنەن  قارجىلاندىرۋدى جۇزەگە اسىرۋعا تىيىم سالىنادى»

ەكىنشى بولىگى: «قازاقستان رەسپۋبليكاسىنىڭ ازاماتتارى بولىپ تابىلمايتىن سپورتشىلاردى كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا جول بەرىلمەيدى», – دەدى دەپۋتات.

49-باپ. دەنە شىنىقتىرۋ مەن سپورتتى قارجىلاندىرۋ كوزدەرىنىڭ 6-تارماعى مىناداي مازمۇندا جازىلادى:

«بيۋدجەت قاراجاتى ەسەبىنەن قارجىلاندىرۋ مىناداي باعىتتار بويىنشا جۇزەگە اسىرىلادى:
1) جوعارى جەتىستىكتەر سپورتى, ونىڭ ىشىندە سپورتتىڭ باسىم تۇرلەرى;
2) مەملەكەتتىك سپورت ۇيىمدارىنىڭ جۇمىس ىستەۋى;
3) بۇقارالىق سپورت;
4) سپورتتىق ينفراقۇرىلىمدى دامىتۋ»;