Endi toı men sadaqada mobıldi aýdarymdar arqyly jınalǵan qarajat ta baqylanady

Foto: Pixabay

Qazaqstanda endi toı men sadaqa, tipti qaıyrymdylyqqa mobıldi aýdarymdar arqyly jınalǵan qarajat ta baqylaýǵa alynady. Esepshot ıesine 1 aıda 100 túrli adamnan aqsha tússe, ol «salyqtan jaltarǵan kásibi bar» degen kúdikke ilinbek. Ondaı jaǵdaıda habarlama joldanyp, azamat 30 kún oǵan 100 adam nege qarajat aýdarǵanyn túsindirý kerek. Bul týraly qandastar.kz aqparat portaly «Informbıýro» jańalyqtar baǵdarlamasyna silteme jasap habarlaıdy.

Qazaqstandyqtardyń mobıldi aýdarymdaryn tekserýdi kózdeıtin memlekettik kirister komıtetiniń qaýlysy 3 jyl buryn kúshine endi. Biraq bıyldan bastap operaııalardyń sany ǵana emes, mólsheri de esepke alynady. Bir azamatqa bir aı ishinde 100 túrli adamnan jalpy 255 myń teńge tússe, jeke tulǵany salyq organdary teksere bastaıdy.

“Qańtarda 100 túrli adamnan 100 aýdarym emes, aqpanda 100 túrli adamnan, naýryzda 100 túrli adamnan, ıaǵnı 3 aı qatarynan mobıldi aýdarymmen aqsha tússe, sol kezde ǵana nazarǵa ilinedi. Ekinshi deńgeıli bank málimet beredi. Ári qaraı kameraldyq baqylaý júrgiziledi. Olardyń jalpy somasy 255 myń teńgeden assa ǵana nazarǵa ilinedi”, – dedi memlekettik kirister komıteti basqarmasynyń bas sarapshysy Ersaıyn Kóptileýuly.

Degenmen ázirge shekti soma bekitilmegen. Biraq 100 teńgeniń ózi 1 aýdarym retinde sanalatynyn eskergen jón. Memlekettik kirister komıteti ókilderiniń málimdeýinshe, jalpy bul baqylaý salyqtan jaltarǵan kásipkerlerdi anyqtaý maqsatynda júrgiziledi.

“Jeke basqa qatysty aýdarymdar tekserilmeıdi. Tek jeke tulǵa retinde ashqan esepshotyn bızneske qoldanǵan kásipkerlerdi baqylaýǵa alýdy kózdep otyrmyz. Búginde olar salyqtan aınalyp ótý úshin tıisti shotyna aqsha túsirmeıdi. Máselen 2024 jyly kásipkerdiń 76%-y tabysyn 5 mıllıon dep kórsetken”, – dedi memlekettik kirister komıteti departamentiniń basshysy Dına Qusaıynova.

Kópshilik mobıldi aýdarymdardy baqylaýǵa alyp, shekten asqandarǵa tekseris jasaǵandy quptamaıdy.

“Maǵan 1 aıda 200-300 aýdarym túsedi. Biraq kásipker emespiz ǵoı. Ony taǵy bir 10 jyldan keıin qolǵa alsa bolady”, “Kedergi keltiredi. 100 aýdarymnan kóp jasaımyz 100 adam 100 teńgeden aýdarýy múmkin. Endi ol kásipkerlikke jatpaıdy ǵoı”, “Áýeli jeke kásip ashqan azamattardyń aýdarymdaryn teksergeni durys bolady. Aýdarymdaryn baqylasyn. Kóp adamda jeke kásip joq. Qarapaıym adamdarǵa, stýdentterge bul aýyr túsedi” dedi halyq.

Kóptiń oıynsha, salyqshylardyń qolǵa alǵan sharasy aýdarym sanyn edáýir azaıtady. Negizi bul pikir shyndyqqa janasady. Byltyr jeltoqsanda Qazaqstandaǵy aqsha aýdarymdar sany sońǵy 3 jyldaǵy eń tómen kórsetkishke túsken.