ەندى ۇيىندە تۇرمايتىن ادامداردى تىركەگەندەر جاۋاپقا تارتىلۋى مۇمكىن

فوتو: ۇكىمەت

ماجىلىستە استانا, الماتى جانە شىمكەنت سياقتى ءىرى قالالارداعى كوشى-قون پروتسەستەرىن رەتتەيتىن زاڭ قارالىپ جاتىر, دەپ حابارلايدى  qandastar.kz

زاڭ جوباسىن ءبىرىنشى وقىلىمدا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين تانىستىردى.

قازىرگى ۋاقىتتا حالىق ءىرى قالالاردا ءومىر سۇرۋگە تالپىنىپ جاتىر. بۇل پاتەرلەردە تۇرعىنداردىڭ سانىن شەكتەۋسىز تىركەۋ پروبلەماسىنا الىپ كەلدى. تاجىريبە كورسەتكەندەي, تۇرعىن ءۇي يەلەرى ۇيىندە ناقتى تۇرمايتىن جۇزدەگەن ازاماتتاردى تىركەۋ فاكتىلەرى بار. استانا قالاسىنىڭ پاتەرلەرىنىڭ بىرىندە 800-دەن استام ادام تىركەلگەن. جالپى ايتقاندا, 924 وسىنداي مەكەنجاي انىقتالدى, — دەدى جۇمانعارين.

BAQ.KZ ءتىلشىسى حابارلاعانداي,  ۇكىمەت مۇشەسى ماسەلەنى قالاي شەشۋگە بولاتىنىن ايتتى:

— ەلوردا اۋماعىندا تۇراقتى جانە ۋاقىتشا تۇراتىن جەرى بويىنشا تىركەۋ ءنورماتيۆىن بەكىتۋ, ياعني ماسليحاتپەن الداعى ۋاقىتتا ءبىر ازاماتقا قانشا شارشى مەتر ءتيىسىلى ەكەنى بەلگىلەنەدى;

— استانا اۋماعىندا ءبىر مەكەنجايدا نورماتيۆتەردەن ارتىق تىركەۋگە تىيىم سالۋ بويىنشا وزگەرىستەر ەنگىزۋ ۇسىنىلادى.

سەرىك جۇمانعارينننىڭ سوزىنشە, بۇل تىركەۋ نورماتيۆتەرى تۇرعىن ءۇيدىڭ مەنشىك يەسىنىڭ جانە جۇبايىنىڭ جاقىن تۋىستارىنا قولدانىلمايدى.

سونداي-اق اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ اياسىندا تۇرعىن ۇيلەردە تىركەلگەن جانە تۇرمايتىن جەكە تۇلعالاردى تىركەۋدەن شىعارماعانى ءۇشىن تۇرعىن ءۇي يەسىنە جاۋاپكەرشىلىك كۇشەيتىلەدى, — دەپ ايتتى پرەمەر-ءمينيستردىڭ ورىنباسارى ماجىلىستەگى وتىرىستا.

ايتا كەتسەك, بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە استانانى جانە رەسپۋبليكالىق ماڭىزى بار قالالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ ءبىرىنشى وقىلىمدا قارالىپ جاتىر.