قارجى جانە تولەمدەر
ەندى ءۇش اي قاتارىنان 100 ادامنان اۋدارىم تىركەلسە, سالىق ورگاندارى تەكسەرەدى
فوتو: اشىق دەرەككوز
ءۇش اي قاتارىنان 100 ءتۇرلى ادامنان اۋدارىم تۇسسە عانا, سالىق ورگاندارى تەكسەرەدى, دەپ جازدى qandastar.kz
بۇل تۋرالى قارجى مينيسترلىگىنىڭ مەملەكەتتىك كىرىستەر كوميتەتىنىڭ باس ساراپشىسى ەرسايىن كوپتىلەۋ ۇلى ايتتى.
«ماسەلەن, جەكە ادامنىڭ كاسپيىنە قاڭتار ايىندا 100 ءتۇرلى ادام, اقپاندا دا 100 ادام, ناۋرىزدا دا 100 تۇلعادان اقشا اۋدارىلسا عانا نازارعا ىلىنەدى», – دەدى ەرسايىن كوپتىلەۋ ۇلى.
جەكە تۇلعالارىڭ ءموبيلدى اۋدارىمدارىنا سالىق سالىنبايدى.
«ءموبيلدى اۋدارىمدار – كاسىپكەرلەرگە ەمەس, جەكە تۇلعالارعا ارنالعان قۇرال. ولارعا سالىق سالىنبايدى. بىراق كاسىپكەرلەر سالىق تولەۋدەن جالتارۋ ءۇشىن ءموبيلدى كوپ پايدالانىپ كەتتى. سوندىقتان سالىقتان جالتارعانداردى انىقتاپ, ولاردىڭ كىرىسىنە سالىق تولەۋدى مىندەتتەۋ جانە كاسىپپەن اينالىسسا دا, تىركەلمەي جۇرگەندەردى دارا كاسىپكەر رەتىندە تىركەتۋ ماقساتىندا ءموبيلدى اۋدارىمداردى باقىلايمىز», – دەدى ول.
سالىق تولەۋدەن جالتارعان كاسىپكەرلەرگە الدىمەن ەسكەرتۋ بەرىلەدى. ەكىنشى رەت قايتالانسا, 40 اەك (157 280 تەڭگە) كولەمىندە ايىپپۇل سالىنادى. سونىمەن قاتار مەملەكەتتىك كىرىستەر كوميتەتىنىڭ ماماندارى 255 مىڭ تەڭگە شەك ءالى زاڭمەن بەكىتىلمەگەنىن ايتادى. بۇل قارجى مينيسترلىگىنىڭ ۇسىنىسى عانا. وسى رەتتە مامان 255 مىڭ تەڭگەنىڭ قايدان شىققانىن ءتۇسىندىرىپ ءوتتى.
«بىزدە كاسىپكەرلىك كودەكسىندە 12 ەڭ تومەنگى جالاقى دەگەن تۇسىنىك بار. 12 ەڭ تومەنگى جالاقىدان تومەن تابىس تاپساڭىز, ءسىز دارا كاسىپكەر رەتىندە تىركەلمەۋگە قۇقىلىسىز. ال ەندى 255 مىڭعا كەلسەك, بۇل – ءۇش ايداعى ەڭ تومەنگى جالاقى. ءبىر جىلدا 12 اي بار دەپ ەسەپتەسەك, 3 اي بويىنشا ەڭ تومەنگى جالاقى كولەمى 255 مىڭ بولادى. 2024 جىلى ەڭ تومەنگى جالاقى 85 مىڭ تەڭگە بولدى. 3-ءتى 85 مىڭعا كوبەيتسەڭىز 225 مىڭ بولادى», – دەدى.
