Qarjy jáne tólemder
Endi úsh aı qatarynan 100 adamnan aýdarym tirkelse, salyq organdary tekseredi
Foto: ashyq derekkóz
Úsh aı qatarynan 100 túrli adamnan aýdarym tússe ǵana, salyq organdary tekseredi, dep jazdy qandastar.kz
Bul týraly Qarjy mınıstrliginiń Memlekettik kirister komıtetiniń bas sarapshysy Ersaıyn Kóptileýuly aıtty.
«Máselen, jeke adamnyń Kaspıine qańtar aıynda 100 túrli adam, aqpanda da 100 adam, naýryzda da 100 tulǵadan aqsha aýdarylsa ǵana nazarǵa ilinedi», – dedi Ersaıyn Kóptileýuly.
Jeke tulǵalaryń mobıldi aýdarymdaryna salyq salynbaıdy.
«Mobıldi aýdarymdar – kásipkerlerge emes, jeke tulǵalarǵa arnalǵan qural. Olarǵa salyq salynbaıdy. Biraq kásipkerler salyq tóleýden jaltarý úshin mobıldi kóp paıdalanyp ketti. Sondyqtan salyqtan jaltarǵandardy anyqtap, olardyń kirisine salyq tóleýdi mindetteý jáne kásippen aınalyssa da, tirkelmeı júrgenderdi dara kásipker retinde tirketý maqsatynda mobıldi aýdarymdardy baqylaımyz», – dedi ol.
Salyq tóleýden jaltarǵan kásipkerlerge aldymen eskertý beriledi. Ekinshi ret qaıtalansa, 40 AEK (157 280 teńge) kóleminde aıyppul salynady. Sonymen qatar Memlekettik kirister komıtetiniń mamandary 255 myń teńge shek áli zańmen bekitilmegenin aıtady. Bul Qarjy mınıstrliginiń usynysy ǵana. Osy rette maman 255 myń teńgeniń qaıdan shyqqanyn túsindirip ótti.
«Bizde Kásipkerlik Kodeksinde 12 eń tómengi jalaqy degen túsinik bar. 12 eń tómengi jalaqydan tómen tabys tapsańyz, siz dara kásipker retinde tirkelmeýge quqylysyz. Al endi 255 myńǵa kelsek, bul – úsh aıdaǵy eń tómengi jalaqy. Bir jylda 12 aı bar dep eseptesek, 3 aı boıynsha eń tómengi jalaqy kólemi 255 myń bolady. 2024 jyly eń tómengi jalaqy 85 myń teńge boldy. 3-ti 85 myńǵa kóbeıtseńiz 225 myń bolady», – dedi.
