جاڭالىقتار
ەندى جەدەل جاردەم كولىگىن ونلاين كارتادان باقىلاۋعا بولادى
استانادا جەدەل جاردەمنىڭ قاي جەردە كەلە جاتقانىن ەندى ناقتى ۋاقىت رەجيمىندە باقىلاۋعا بولادى. پيلوتتىق جوبا تۋرالى دەنساۋلىق ساقتاۋ مينيسترلىگى ءمالىم ەتتى. بۇل تۋرالى Qandastar.kz سايتى كتك ارناسىنا سىلتەمە جاساپ حابارلايدى.
ارنايى ءموبيلدى قوسىمشا ارقىلى جەدەل جاردەمنىڭ قاي جەردە كەلە جاتقانىن كەيبىر شاقىرتۋلار ساناتى بويىنشا تەك ەلوردا تۇرعىندارى باقىلاي الادى.
ەندى جەدەل جاردەمنىڭ ءبىرىنشى كەزەكتەگى شۇعىل شاقىرتۋلارى بويىنشا ناۋقاستىڭ تەلەفونىنا SMS-حابارلاما كەلەدى. وندا جەدەل جاردەم كولىگىنىڭ ناقتى ۋاقىت رەجيمىندە قوزعالىسىن باقىلاۋعا مۇمكىندىك بەرەتىن ونلاين كارتاعا سىلتەمە بولادى. بۇل كارتا ارقىلى ناۋقاس جەدەل جاردەمنىڭ قاي جەردە كەلە جاتقانىن كورە الادى.
دەنساۋلىق ساقتاۋ مينيسترلىگىنىڭ مالىمەتىنشە, «103» نومىرىنە حابارلاساتىن ازاماتتاردىڭ جارتىسىنا جۋىعى جەدەل جاردەمنىڭ كەلۋ ۋاقىتىن ناقتىلايدى. ال جاڭا ينتەراكتيۆتى كارتا ديسپەتچەرلىك قىزمەتكە تۇسەتىن قايتالاما قوڭىراۋلاردى ازايتىپ, ديسپەتچەرلەرگە باسقا شاقىرتۋلاردى قابىلداۋعا مۇمكىندىك بەرەدى.
“قازاقستان رەسپۋبليكاسى دەنساۋلىق ساقتاۋ مينيسترلىگى استانا قالاسىنىڭ اكىمدىگى جانە Yandex Qazaqstan كومپانياسىمەن بىرلەسىپ, جەدەل مەديتسينالىق كومەك بويىنشا پيلوتتىق جوبانى ىسكە قوستى. بولاشاقتا بۇل جوبانى ءارى قاراي دامىتۋدى كوزدەپ وتىرمىز. ەگەر پيلوتتىق جوبانىڭ ناتيجەسى وڭ بولسا, ونى شۇعىل قوڭىراۋلاردىڭ باسقا ساناتتارى جانە ەلىمىزدىڭ وزگە قالالارى مەن وڭىرلەرىنە دە كەڭەيتەمىز”, – دەنساۋلىق ساقتاۋ مينيسترلىگىنىڭ ەلەكتروندىق دەنساۋلىق ساقتاۋدى دامىتۋ دەپارتامەنتى ديرەكتورىنىڭ مىندەتىن اتقارۋشى ايدار قاسەنوۆ.
