جاڭالىقتار
ەندى جولاۋشىلار پويىز قوزعالىسىن ناقتى ۋاقىتتا باقىلاي الادى
فوتو:istockphoto.com
جولاۋشىلار ءۇشىن پويىز قوزعالىسىن ناقتى ۋاقىت رەجيمىندە باقىلاۋ قىزمەتى ىسكە قوسىلدى. بۇل تۋرالى «جولاۋشىلار تاسىمالى» اق ءباسپاسوز قىزمەتى مالىمدەدى, دەپ جازدى qandastar.kz
«جولاۋشىلار تاسىمالى» اق جولاۋشىلارعا ارنالعان «پويىز قوزعالىسىنىڭ ونلاين تاقتاسى» اتتى جاڭا تسيفرلىق سەرۆيستى قولدانىسقا ەنگىزدى. ەندى جولاۋشىلار ناقتى ۋاقىت رەجيمىندە پويىزداردىڭ كەلۋ جانە كەتۋ ۋاقىتىن باقىلاپ, قوزعالىس كەستەسىندەگى وزگەرىستەر تۋرالى جەدەل اقپارات الا الادى.
اتالعان قىزمەت «جولاۋشىلار تاسىمالى» اق سيتۋاتسيالىق ورتالىعى اياسىندا ازىرلەندى. ورتالىق جولاۋشىلار پويىزدارىنىڭ قوزعالىسىن تاۋلىك بويى باقىلاپ, مونيتورينگ جۇرگىزەدى. پويىزدارعا ورناتىلعان GPS-ترەكەرلەر دەرەكتەردى اۆتوماتتى تۇردە ورتالىققا جىبەرىپ, پويىزداردىڭ ورنالاسقان جەرىن ءدال انىقتاۋعا جانە قوزعالىس كەستەسىن جەدەل جاڭارتۋعا مۇمكىندىك بەرەدى. جاڭا سەرۆيس جولاۋشىلارعا bilet.railways.kz رەسمي سايتىندا قولجەتىمدى», — دەلىنگەن قتج حابارلاماسىندا.
پويىز قوزعالىسى تۋرالى اقپارات الۋ ءۇشىن:
1. https://bilet.railways.kz (https://bilet.railways.kz/) سايتىنا كىرۋ قاجەت.
2. «پويىز قوزعالىسىنىڭ ونلاين تاقتاسى» باننەرىن باسۋ كەرەك.
3. كارتادان قاجەتتى پويىزدى تاڭداۋ قاجەت.
4. سونداي-اق قىزمەتكە https://tablo-railways.kz/ru/ سايتى ارقىلى دا كىرۋگە بولادى.
«پويىز قوزعالىسىنىڭ ونلاين تاقتاسى» جولاۋشىلارعا ناقتى ۋاقىت رەجيمىندە پويىزدىڭ قوزعالىسىن كارتادان باقىلاۋعا (پويىز قىزىل تۇسپەن بەلگىلەنەدى), تاڭداعان ستانتسياداعى كەلۋ جانە جونەلتۋ كەستەسىن تەكسەرۋگە, قوزعالىس كەستەسىندەگى وزگەرىستەردى باقىلاۋعا, بارلىق ايالداما ستانتسيالارىن, ولاردىڭ كۇتۋ ۋاقىتىن جانە مەجەلى بەكەتكە شامامەن كەلۋ ۋاقىتىن كورۋگە مۇمكىندىك بەرەدى.
Tablo-railways.kz سايتىندا پويىز بيلەتتەرىن ونلاين ساتىپ الۋ, ەلەكتروندى وتىرعىزۋ تالونىن الۋ, ورىنداردى تالاپ-شاعىم بويىنشا قايتارۋ, اعىمداعى پويىزدار كەستەسىن قاراۋ جانە جۇكتەردىڭ قۇنىن ەسەپتەۋ سياقتى قوسىمشا قىزمەتتەر قولجەتىمدى.
«ۇلتتىق تاسىمالداۋشى جولاۋشىلارعا ساپالى جانە ىڭعايلى قىزمەت كورسەتۋگە باسىمدىق بەرەدى. وسى ماقساتتا سەرۆيس جۇمىسىنا قاتىستى ۇسىنىستار مەن پىكىرلەردى قابىلداۋ جۇيەسى ىسكە قوسىلعان. جولاۋشىلار ءوز ەسكەرتۋلەرى مەن تىلەكتەرىن سايتتاعى «كەرى بايلانىس» ءبولىمى ارقىلى قالدىرا الادى», — دەپ ءتۇسىندىردى قتج وكىلدەرى.
