جاڭالىقتار
ەنەرگەتيكا ءمينيسترى بەنزين تۋرالى: رەسەيدەگىدەي جاعداي بىزدە قايتالانبايدى دەپ ويلايمىن
فوتو: كوللاج
بۇگىن, 2025 جىلى 8 قىركۇيەكتە قر پارلامەنتى قوس پالاتاسىنىڭ بىرلەسكەن وتىرىسى الدىندا ءوزىن قاۋمالاعان جۋرناليستەر سۇراقتارىنا ەنەرگەتيكا ءمينيسترى ەرلان اقكەنجەنوۆ جاۋاپ بەردى. ول قازاقستانداعى بەنزين باعاسىنا قاتىستى دا پىكىر ءبىلدىردى, دەپ حابارلايدى qandastar.kz
باق وكىلدەرى دوللار باعامىنىڭ ءوسىپ جاتقانىنا مينيستر نازارىن اۋدارتتى.
«بۇل ارادا دوللارعا بايلاناتىنداي جاعداي جوق بولار. ىشكى سۇرانىستار مەن ۇسىنىستار بار, رەسەي فەدەراتسياسىنداعى جاعدايعا بايلانىستى ادامداردىڭ قوبالجۋى بار, قالاي دەگەنمەن دە 7 مىڭ شاقىرىمعا جۋىق شەكارانى اينالىپ ءوتۋىمىز مۇمكىن ەمەس قوي. سوندىقتان, رەسەي وڭىرلەرىندەگى بەنزين تاپشىلىعى ماسەلەسى ءبىزدىڭ ازاماتتارىمىزدا دا بەلگىلى ءبىر دەڭگەيدە الاڭداۋشىلىق تۋعىزۋدا», — دەدى مينيستر.
Dalanews.kz جازعانداي, بۇگىنگى تاڭدا ەلىمىزدە اي-95-كە قاتىستى جاعداي تۇراقتى.
«وتكەن اپتادا بىزدە 21 كۇننىڭ, ال قازىر 26 كۇننىڭ قورى بار. قور كولەمى ارتىپ, زاۋىتتار تۇراقتى جۇمىس ىستەپ تۇر. اي-92 بويىنشا دا جاعداي وسىنداي. مەنىڭ ويىمشا, رەسەي فەدەراتسياسىنداعىداي جاعداي بىزدە قايتالانبايدى», — دەپ سەندىرەدى اقكەنجەنوۆ.
ول جانار-جاعارمايدى ەلدەن تاسىپ اكەتۋگە سالىنعان تىيىم ۇنەمى ۇزارتىلىپ وتىراتىنىن دا ناقتىلادى.
ايتا كەتسەك, وتكەن اپتادا, ياعني جاڭا وقۋ جىلى الدىندا اي-92 ماركالى بەنزين باعاسى ەلىمىزدەگى مەگاپوليستەردىڭ جانار-جاعارماي قۇيۋ بەكەتتەرىندە 6 تەڭگەگە دەيىن قىمباتتاعانى بەلگىلى.
