جاڭالىقتار
ەنەرگەتيكا ءمينيسترى ديزەل وتىنىنىڭ جاڭا باعاسىن جاريالادى
فوتو: canva
ەنەرگەتيكا ءمينيسترى الماسادام ساتقاليەۆ الداعى ماۋسىمدا اۋىلشارۋاشىلىق وندىرۋشىلەرى ءۇشىن ديزەل وتىنىنىڭ بولجامدى باعاسىن اتادى, دەپ حابارلايدى qandastar.kz اقپارات پورتالى Massaget.kz-كە سىلتەمە جاساپ.
كوكتەمگى دالا جۇمىستارىنا دايىندىق ماسەلەلەرىنە ارنالعان ۇكىمەت وتىرىسىندا ءسوز سويلەگەن ساتقاليەۆ بۇعان دەيىن ەكى جىل بويى ديزەل وتىنىنىڭ باعاسى وڭىرلەرگە جەتكىزۋىمەن ليترىنە 228 تەڭگە كولەمىندە ساقتالىپ كەلگەنىن ايتتى. ءبىر ءليتردىڭ تۇپكىلىكتى باعاسى ققس-پەن 250 تەڭگەنى قۇرادى, ديزەل وتىنىن جەتكىزۋشى وپەراتورلاردىڭ مارجاسى ليترىنە 22 تەڭگە بولدى.
«2025 جىلدىڭ 30 قاڭتارىندا اي-92 جانە ديزەل وتىنىنىڭ باعاسىن مەملەكەتتىك رەتتەۋ كۇشىن جويدى. ەنەرگەتيكا مينيسترلىگى ۇسىنىپ وتىرعان ديزەل وتىنىنىڭ قازىرگى باعاسى وڭىرلەردەگى تاعايىندالعان ستانتسياعا ليترىنە 232 تەڭگەنى قۇرايدى. سوڭعى باعانى ايماقتىق وپەراتورلار بەلگىلەيدى جانە ءبىر ليترگە 254 تەڭگە بولۋى مۇمكىن» دەدى مينيستر.
مينيستر جانار-جاعارماي قۇيۋ ستانتسيالارىنداعى باعا كوتەرىلگەن سايىن ولار «پروپورتسيونالدى تۇردە وسەتىنىن» اتاپ ءوتتى. بۇل رەتتە جانارماي قۇيۋ بەكەتىندەگى باعادان 15 پايىزدىق جەڭىلدىك وزگەرىسسىز قالادى.
30 قاڭتاردا ەنەرگەتيكا جانە اۋىل شارۋاشىلىعى مينيسترلىكتەرى 2025 جىلعى 1 اقپان مەن 30 ماۋسىم ارالىعىندا كوكتەمگى دالا جۇمىستارىنا 401 مىڭ توننا ديزەل وتىنىن جەتكىزۋ كەستەسىن بەكىتتى.
