ەو ۆەنگريانى داۋىس بەرۋ قۇقىعىنان ايىرۋى مۇمكىن

ەۋروپالىق وداق كەڭەسى 27 مامىردا ۆەنگريانىڭ داۋىس بەرۋ قۇقىعىنان ايىرىلۋ مۇمكىندىگىن تالقىلايتىن بولادى. بۇل تالقىلاۋ ەو تۋرالى شارتتىڭ 7-بابى نەگىزىندە وتەدى. اتالمىش اقپارات ۆەدومستۆونىڭ رەسمي سايتىندا جاريالاندى, دەپ حابارلايدى qandastar.kz.

كەڭەستە مينيسترلەر ۆەنگريا بويىنشا سەگىزىنشى تىڭداۋ وتكىزەدى. ەو تۋرالى شارتتىڭ 7-بابى ەۋرووداقتىڭ «قۇندىلىقتارىن جۇيەلى تۇردە بۇزعان» مۇشە ەلدەرگە قاتىستى قولدانىلادى. بۇل بۇزۋشىلىقتارعا قۇقىقتىڭ ۇستەمدىگى, دەموكراتيالىق نورمالار جانە ادام قۇقىقتارى جاتادى. شارتتا مۇنداي ەلدىڭ كەيبىر قۇقىقتارىن, ونىڭ ىشىندە داۋىس بەرۋ قۇقىعىن توقتاتۋ قاراستىرىلعان.

بۇل قادام ۆەنگرياعا قاتىستى ەو-نىڭ ۇزاق ۋاقىت بويى جۇرگىزىپ كەلە جاتقان سىندارىمەن بايلانىستى. بۋداپەشتتىڭ ەو-نىڭ ورتاق ساياساتتارىنا, اسىرەسە ۋكرايناعا كومەك جانە ەنەرگەتيكا سالاسىنداعى بىرلەسكەن شارالارعا قاتىستى ۇستانىمى سىنعا الىنعان.

ايتا كەتەيىك, كەشە ۆەنگريا پرەمەر-ءمينيسترى ۆيكتور وربان ەۋروپالىق وداقتىڭ ەنەرگەتيكالىق ساياساتىن «ابسۋرد» دەپ اتادى جانە ونى ۋكراينانى قولداۋ ماقساتىنداعى ارەكەت رەتىندە سيپاتتادى. ول سونىمەن قاتار ەو-نى ەنەرگەتيكالىق قاۋىپتەرمەن بىرلەسە كۇرەسۋگە شاقىردى.

Reuters 20 مامىردا ۆەنگريا پارلامەنتى حالىقارالىق قىلمىستىق سوتتان (حقس) شىعۋ تۋرالى زاڭ جوباسىن ماقۇلداعانىن حابارلادى. وربان بۇل سوتتى «ساياساتتاندىرىلعان» دەپ ايىپتاپ, ونىڭ تاۋەلسىزدىگىن جوعالتقانىن مالىمدەدى.

وسى فاكتورلاردىڭ جيىنتىعى ەو مەن ۆەنگريا اراسىنداعى شيەلەنىستى كۇشەيتىپ وتىر. 27 مامىرداعى تىڭداۋ بۋداپەشتتىڭ ەو ىشىندەگى بولاشاق ورنىنا ەلەۋلى اسەر ەتۋى مۇمكىن.