ەر ادام جۇكتى ايەلىنىڭ ءىشىن ۇستاعانى ءۇشىن فەلدشەردى اياۋسىز ۇرىپ-سوققان

تۇركىستاندا مەديتسينالىق كومەك كورسەتۋگە بارعان فەلدشەر سوققىعا جىعىلدى. تۇسىك تاستاۋ قاۋپىمەن شاقىرتقان كەلىنشەكتى كورۋگە بارعان مەديتسينا قىزمەتكەرىن پاتسيەنتتىڭ كۇيەۋى ۇرىپ تاستاعان, دەپ حابارلايدى Qandastar.kz كتك ارناسىنا سىلتەمە جاساپ.

وقيعا جەدەل جاردەم شاقىرتقان ەرلى-زايىپتىنىڭ پاتەرىندە بولعان. 26 جاستاعى فەلدشەر تۇسىك تاستاۋ مەن سوقىر ىشەكتەن كۇدىكتەنىپ, اياعى اۋىر كەلىنشەكتىڭ ءىشىن ۇستاپ تەكسەرگەن. الايدا ونىڭ ارەكەتى ناۋقاستىڭ كۇيەۋىنە ۇناماي قالعان. ەر ادام اشۋعا بوي الدىرىپ, مەديتسينا قىزمەتكەرىن سوعىپ تاستاعان.

«الدىمەن بەتىنەن جۇدىرىقپەن ۇردى, وڭ جاق بەتىنەن ۇردى. ۇرعان كەزدە باسى قابىرعاعا سوعىلىپ, وتىرىپ قالدى. اياعىمەن بار كۇشىمەن بەتىنەن تەپتى. مەڭ-زەڭ بولدى. كەيىن اياعىمەن ءۇشىنشى رەت تەپتى. سول كەزدە يىعىنا ءتيدى. يىعىنا تيگەننەن كەيىن, اناسى ارتىنان قۇشاقتاپ اجىراتىپ الدى», — دەدى جەدەل جاردەم ستانتسياسىنىڭ پراكتيكانتى جانەل قۋانىشبەك.

اۋىر سوققى العان جەدەل جاردەم قىزمەتكەرى ميى شايقالىپ, قازىر اۋرۋحانادا جاتىر.

ء«تيىستى دياگنوستيكا زەرتتەۋى جۇرگىزىلىپ, جابىق باس جاراقاتى, ميىنىڭ شايقالۋى, كوزىنىڭ جۇمساق تىندەرى زاقىمدانعان, گەماتوما دياگنوزىمەن تراۆماتولوگيا بولىمشەسىنە جاتقىزىلدى. قازىر ناۋقاستىڭ دەنساۋلىعى ورتاشا اۋىر. ءتيىستى مامانداردىڭ كەڭەسى تاعايىندالدى», — دەپ حابارلادى اۋرۋحانا وكىلدەرى.

جەدەل جاردەم ستانتسياسىنىڭ اقپاراتىنشا, قوس تاراپ كەلىسىمگە كەلىپ, جابىرلەنۋشى ءوزىن سوققىعا جىققان ازاماتقا كەشىرىمىن بەرگەن. فەلدشەر پوليتسياعا ارىز جازباعان. الايدا مەديتسينالىق مەكەمە ەڭبەك ينسپەكتسياسىنا ارىز بەرگەن.