ەربايان مۇحتار تۇركيادا تولىققاندى رەابيليتاتسيادان وتەدى

فوتو: اشىق دەرەككوز

بەلسەندى ءارى زاڭگەر ينگا يمانباي ەربايان مۇحتاردىڭ ەكىنشى كەزەڭدەگى ەمى تۋرالى جاقسى جاڭالىعىن ءبولىستى, دەپ حابارلايدى qandastar.kz

ونىڭ ايتۋىنشا, بۇگىن تاڭعى بەستە ەربايان ىستانبۇلعا تولىققاندى رەابيليتاتسيادان ءوتۋ ءۇشىن اتتانعان. ونىمەن اتا-اناسى بىرگە كەتكەن.

«بۇل ساپار ەربايان ءۇشىن شەشۋشى كەزەڭ. سول سەبەپتى بارلىعىمىز بىرگە بالامىزعا اق جول, ءساتتى ساپار تىلەيىك», – دەدى ەمدەلۋشىنىڭ قورعاۋشىسى.

ءبىرىنشى كەزەڭدەگى وپەراتسيا مەن ەمدى حالىقتىڭ قولداۋىمەن وتكەرسە, بۇل جولى مەملەكەتتەن ۇلكەن كومەك كورسەتىلدى. ينگا يمانبايدىڭ ايتۋىنشا, پورتال ارقىلى ءۇش ايعا سوزىلاتىن قىمبات ءارى ماڭىزدى رەابيليتاتسيالىق ەم تولىق قارجىلاندىرىلعان. ال ۇشۋدى ىشكى ىستەر جانە قورعانىس مينيسترلىكتەرى بىرلەسىپ ۇيىمداستىرعان.

وسىعان بايلانىستى ەرباياننىڭ اتا-اناسى دەنساۋلىق ساقتاۋ ءمينيسترى اقمارال النازاروۆاعا جانە گەنەرال قايرات ۇمبەتوۆكە العىس ايتتى.

«حالىقتىڭ نازارىن اۋدارتۋ, مەملەكەتتىك ورگانداردى ىسكە جۇمىلدىرۋ, وسىنداي ماڭىزدى ەمدى ۇيىمداستىرۋ – ءبىر كۇننىڭ شارۋاسى ەمەس. بۇل ۇزاق كەلىسسوزدەر مەن تاباندى ەڭبەكتىڭ جەمىسى. ايقايسىز, بىراق جۇيەلى جاسالعان جۇمىس», – دەدى ينگا يمانباي.

ول سونىمەن بىرگە الداعى ءۇش اي ەربايان ءۇشىن شەشۋشى بولاتىنىن اتاپ ءوتتى: «بۇل – ءبىزدىڭ ارمانىمىزعا, ياعني ەرباياننىڭ ءوز اياعىمەن ءجۇرىپ, سويلەپ كەتۋىنە جاقىنداتاتىن ۇلكەن قادام».

رەابيليتاتسيانى ودان ءارى جالعاستىرۋعا دا حالىق جيناعان قاراجاتتىڭ العاشقى ەمنەن قالعان بولىگى جۇمسالماق.

ينگا يمانبايدىڭ ايتۋىنشا, ەرباياننىڭ تولىق ساۋىعۋىنا قانشا ۋاقىت قاجەت ەكەنىن ەشكىم ءدوپ باسىپ ايتا المايدى. دەگەنمەن ول حالىقتىڭ كومەگىمەن, اتا-اناسىنىڭ جىگەرىمەن بۇل كۇنگە دە جەتەتىنىنە سەنىم ءبىلدىردى.