ەربول مىرزابوسىنوۆ بۇكىلالەمدىك تۋريزم كۇنى اياسىندا سالا قىزمەتكەرلەرىن ماراپاتتادى

فوتو: تۋريزم جانە سپورت مينيسترلىگى

تۋريزم جانە سپورت ءمينيسترى ەربول مىرزابوسىنوۆ بۋرابايدا ءوتىپ جاتقان «قازاقستان ساياحات فورۋمىنا» قاتىسىپ, قازاقستاندىقتاردى بۇكىلالەمدىك تۋريزم كۇنىمەن قۇتتىقتادى, دەپ حابارلايدى Qandastar.kz.

ءىس-شارا اياسىندا مينيستر ەلىمىزدىڭ تۋريزم سالاسىن دامىتۋعا ەلەۋلى ۇلەس قوسىپ كەلە جاتقان مامانداردى «تۋريزم سالاسىنا سىڭىرگەن ەڭبەگى ءۇشىن» جانە «تۋريزم سالاسىنىڭ ۇزدىگى» توسبەلگىسىمەن, قۇرمەت گراموتاسى جانە العىس حاتتارمەن ماراپاتتادى.

ءىس-شارانىڭ رەسمي بولىگىندە ەربول مىرزابوسىنوۆ ءسوز سويلەپ, قازاقستان بيىل تۋريزم سالاسىندا ايتارلىقتاي جەتىستىكتەرگە قول جەتكىزگەنىن اتاپ ءوتتى.

«تۋريزم يندۋسترياسى ەلىمىزدىڭ ەكونوميكالىق ءوسىمىنىڭ ماڭىزدى درايۆەرىنە اينالىپ كەلەدى. وسى جىلدىڭ ماۋسىم ايىندا مەملەكەت باسشىسى تۋريزم ماسەلەلەرى بويىنشا كەڭەيتىلگەن كەڭەس وتكىزدى. اتالعان جيىندا تۋريستىك ورىنداردى ينفراقۇرىلىممەن قامتاماسىز ەتۋ, جولاۋشىلار ۆاگوندارىنىڭ پاركىن جاڭارتۋ, اۋە باعىتتارىن ۇلعايتۋ جانە جاڭا تۋريستىك نىسانداردى قۇرۋ سياقتى سالانى دامىتۋعا قاتىستى ناقتى تاپسىرمالار ايتىلدى. بيىل ءبىز تۋريزم سالاسىندا ايتارلىقتاي جەتىستىكتەرگە قول جەتكىزدىك. اتاپ ايتقاندا, 2024 جىلدىڭ ءبىرىنشى جارتىجىلدىعىنىڭ قورىتىندىسى بويىنشا ورنالاستىرۋ ورىندارى قىزمەت كورسەتكەن ىشكى تۋريستەر سانى 350 مىڭعا ءوسىپ, 3,4 ملن ادامدى قۇرادى. شەتەلدىك تۋريستەر سانى 50 مىڭعا ارتىپ, 566 مىڭ ادامعا جەتتى», – دەدى تۋريزم جانە سپورت ءمينيسترى.

سونداي-اق ۆەدومستۆو باسشىسى قازاقستاننىڭ تۋريستىك الەۋەتى حالىقارالىق ارەنادا تابىستى ناسيحاتتالىپ كەلە جاتقانىن جەتكىزدى.

ماسەلەن, Conde Nast Traveller سياقتى بەدەلدى باسىلىمداردىڭ مالىمەتى بويىنشا, قازاقستان الەمدىك تۋريستىك باعىتتار بويىنشا الدىڭعى قاتارعا قوسىلدى.

بيىل قىتايداعى قازاقستان ءتۋريزمى جىلى اياسىندا قىتايدىڭ ءىرى قالالارىن قامتيتىن 20-دان استام اۋقىمدى ءىس-شارا ۇيىمداستىرىلدى.

ەلىمىزدىڭ تۋريستىك ءيميدجىن نىعايتۋداعى ماڭىزدى وقيعاعا اينالعان دۇنيەجۇزىلىك كوشپەندىلەر ويىندارىن ەرەكشە اتاپ وتكەن ءجون. ەتنواۋىلعا 250 مىڭنان استام ادام كەلىپ, ءىس-شارالارعا قاتىستى.

جالپى, ەلدە تۋريستىك بەلسەندىلىكتىڭ ايتارلىقتاي ارتقانى بايقالىپ وتىر. بۇعان قازاقستاننىڭ دۇنيەجۇزىلىك ەكونوميكالىق فورۋمنىڭ ساياحاتتار مەن ءتۋريزمدى دامىتۋ يندەكسى بويىنشا جاڭارتىلعان رەيتينگتە 52-ورىنعا شىعۋى دالەل.