Erbol Myrzabosynov Búkilálemdik týrızm kúni aıasynda sala qyzmetkerlerin marapattady

Foto: Týrızm jáne sport mınıstrligi

Týrızm jáne sport mınıstri Erbol Myrzabosynov Býrabaıda ótip jatqan «Qazaqstan saıahat forýmyna» qatysyp, qazaqstandyqtardy Búkilálemdik týrızm kúnimen quttyqtady, dep habarlaıdy Qandastar.kz.

Is-shara aıasynda mınıstr elimizdiń týrızm salasyn damytýǵa eleýli úles qosyp kele jatqan mamandardy «Týrızm salasyna sińirgen eńbegi úshin» jáne «Týrızm salasynyń úzdigi» tósbelgisimen, Qurmet gramotasy jáne Alǵys hattarmen marapattady.

Is-sharanyń resmı bóliginde Erbol Myrzabosynov sóz sóılep, Qazaqstan bıyl týrızm salasynda aıtarlyqtaı jetistikterge qol jetkizgenin atap ótti.

«Týrızm ındýstrııasy elimizdiń ekonomıkalyq ósiminiń mańyzdy draıverine aınalyp keledi. Osy jyldyń maýsym aıynda Memleket basshysy týrızm máseleleri boıynsha keńeıtilgen keńes ótkizdi. Atalǵan jıynda týrıstik oryndardy ınfraqurylymmen qamtamasyz etý, jolaýshylar vagondarynyń parkin jańartý, áýe baǵyttaryn ulǵaıtý jáne jańa týrıstik nysandardy qurý sııaqty salany damytýǵa qatysty naqty tapsyrmalar aıtyldy. Bıyl biz týrızm salasynda aıtarlyqtaı jetistikterge qol jetkizdik. Atap aıtqanda, 2024 jyldyń birinshi jartyjyldyǵynyń qorytyndysy boıynsha ornalastyrý oryndary qyzmet kórsetken ishki týrıster sany 350 myńǵa ósip, 3,4 mln adamdy qurady. Sheteldik týrıster sany 50 myńǵa artyp, 566 myń adamǵa jetti», – dedi Týrızm jáne sport mınıstri.

Sondaı-aq vedomstvo basshysy Qazaqstannyń týrıstik áleýeti halyqaralyq arenada tabysty nasıhattalyp kele jatqanyn jetkizdi.

Máselen, Conde Nast Traveller sııaqty bedeldi basylymdardyń málimeti boıynsha, Qazaqstan álemdik týrıstik baǵyttar boıynsha aldyńǵy qatarǵa qosyldy.

Bıyl Qytaıdaǵy Qazaqstan týrızmi jyly aıasynda Qytaıdyń iri qalalaryn qamtıtyn 20-dan astam aýqymdy is-shara uıymdastyryldy.

Elimizdiń týrıstik ımıdjin nyǵaıtýdaǵy mańyzdy oqıǵaǵa aınalǵan Dúnıejúzilik kóshpendiler oıyndaryn erekshe atap ótken jón. Etnoaýylǵa 250 myńnan astam adam kelip, is-sharalarǵa qatysty.

Jalpy, elde týrıstik belsendiliktiń aıtarlyqtaı artqany baıqalyp otyr. Buǵan Qazaqstannyń Dúnıejúzilik ekonomıkalyq forýmnyń saıahattar men týrızmdi damytý ındeksi boıynsha jańartylǵan reıtıngte 52-orynǵa shyǵýy dálel.