جاڭالىقتار
ەربولات دوساەۆ الماتىلىقتارعا ۇندەۋ جاسادى
الماتىنىڭ ەكس-اكىمى ەربولات دوساەۆ قالا تۇرعىندارىنا ۇندەۋ جاسادى, دەپ حابارلايدى qandastar.kz
ەڭ الدىمەن, تۋعان قالاما ەلىمىزدىڭ تاريحىنداعى ەڭ كۇردەلى كەزەڭدەردىڭ بىرىندە قىزمەت ەتۋگە مۇمكىندىك بەرگەنى ءۇشىن مەملەكەت باسشىسىنا تەرەڭ ريزاشىلىعىمدى بىلدىرەمىن. بۇل مەن ءۇشىن زور قۇرمەت قانا ەمەس, ۇلكەن جاۋاپكەرشىلىك تە بولدى. جۇمىسىمنىڭ باسىنان باستاپ مەن وسى جوعارى سەنىمدى اقتاۋ ءۇشىن بارلىق ءبىلىمىم مەن جيناعان تاجىريبەمدى قولدانۋعا تىرىستىم جانە الماتىنى تۇراقتى دامۋ جولىنا شىعارۋ ماقساتىن ۇستاندىم, — دەيدى ەكس-اكىم.
سونداي-اق ول ءوزى قالانى باسقارعان ءۇش جىل ىشىندە قالادا 57 وقۋ ورنى جانە 12 دەنساۋلىق ساقتاۋ نىسانى سالىنعانىن نە جاڭارتىلعانىن ايتتى.
بۇگىن وسى مۇمكىندىكتى پايدالانا وتىرىپ, قيىن-قىستاۋ ساتتەردە بەلسەندى اتسالىسىپ, قولداۋ كورسەتكەندەرىڭىز ءۇشىن بارشاڭىزعا شىن جۇرەكتەن العىس بىلدىرەمىن. مەن ءومىر ءسۇرۋ ساپاسى جوعارى جانە جايلى قالالىق ورتاسى بار, ەڭ زاماناۋي ءارى دامىعان مەگاپوليس رەتىندە الماتىنىڭ بولاشاعىنا شىن جۇرەكتەن سەنەمىن, — دەپ قورىتىندىلادى ەربولات دوساەۆ.
