Erlan Atamqulov sport federaııasyn basqaratyn adamdar aqshany qalaı jymqyryp jatqanyn ashyq aıtty

Foto: vıdeodan kadr

Kezinde «Qazaqstantemirjoly» AQ basqarǵan Erlan Atamqulov sporttaǵy jemqorlyq týraly, ondaǵy aqshany jymqyrý joldary qalaı júzege asyp jatqanyn ashyq aıtty.

Abay Live arnasyna suhbat bergen bıznesmen sportqa qatysy joq adamdardyń kóbi federaııany basqarýǵa qushtar ekenin ataı kele, shetelden legıoner tasý arqyly aqshany úpteýdiń joly qalyptasyp jatqanyn tilge tıek etti. Onyń sózinshe, elimizde sport salasyna jyl saıyn 1 mlrd teńgege jýyq qarjy bólinedi. Al bul soma qajetti qarjydan birneshe ese kóp kórinedi.

«Elimizde sport úshin jylda 800 mln dollar bólinedi. Kezinde men eki voleıbol klýbyn qarjylandyrdym. Áıelder quramasy 8 dúrkin el chempıony atandy. Erler quramasy 3 ret top jardy. Sol klýbtar memleketten 1 tıyn qarjy almady. Soǵan qaramastan qurama komandanyń búkil shyǵynyn tólep otyrdym. Beıjińde ótken Olımpıadada elimizdiń áıelder quramasynda el namysyn «Rahat» komandasynyń músheleri qorǵady. Al qazir bólinetin 800 mln dollar degen masqara aqsha ǵoı? Onyń 10 paıyzy kerek shyǵar. Nelikten sportqa osynsha kólemde qarjy bólinedi?», – dedi Erlan Atamqulov.

Qarjynyń shamadan tys kóptigi kimderge tıimdi ekendigi ataǵan ol federaııa basshylyǵyna kelgen qaltalylar sportqa aqsha salmaıtynyn, kerisinshe salaǵa bólingen aqshany alýǵa jumys isteıtinin jetkizdi.

«Ol aqshanyń bári talan-tarajǵa salynady. Olar (Federaııa – red.) Afrıkadan, basqa elderden sport túrleri boıynsha legıoner ákeledi. Olardyń agentteri bar, olarǵa 1-2 mlndap tóleıdi. Nege? Sebebi, sheteldikpen kelisim jasaý ońaı. Jartysyn legıonerge berip, jartysyn ózderi alady. Oqý-jattyǵý jıyndary bar. Anaý deıdi, mynaý deıdi… Qazir biri fýtboldy, biri jeńil atletkany basqaryp otyr. Bári federaııany basqarýǵa tyrysady. Ne úshin? Basqaryp otyrǵan adamdar buryn sportpen aınalyspaǵan, odan múldem habary joq. Bylaısha aıtqanda stakannan aýyr nárse kótermegen adamdar. Federaııaǵa memleket qyrýar aqsha bóledi. Al memlekettik aqshasyn bólý, ony qalaı jumsaý federaııanyń qolynda. Olar federaııaǵa aqsha alý úshin keledi», – dedi Erlan Atamqulov.