ەرلان قارين: «بيلىك قازاق تىلىنە قيانات جاسادى» دەۋ – بوس اڭگىمە, داۋرىقپا ءسوز

فوتو:

قر مەملەكەتتىك كەڭەسشىسى ەرلان قارين الەۋمەتتىك جەلىدە ايتىلىپ, قىزۋ تالقىلانىپ جاتقان مەملەكەتتىك ءتىلدىڭ مارتەبەسىنە قاتىستى ءوز ويىمەن ءبولىستى, دەپ جازدى qandastar.kz

ساياساتكەر مەملەكەتتىڭ تىلگە قاتىستى ۇستانىمى سول قالپى ەكەنىن ناقتىلايدى, دەپ حابارلايدى Zakon.kz.

مەملەكەتتىك كەڭەسشى وي بولىسكەن, كوزقاراستى اشىق بىلدىرگەن دۇرىس ەكەنىن, بىراق «بيلىك قازاق تىلىنە قيانات جاسادى» دەۋ – بوس اڭگىمە, داۋرىقپا ءسوز ەكەنىن ايتادى.

«اتتانعا سالىپ, ايعايعا باسىپ, جوق جەردەن شۋ شىعاراتىنداي ەشتەڭە بولعان جوق. مەملەكەتتىڭ تىلگە قاتىستى ۇستانىمى سول قالپى. قازاق ءتىلىن ەلىمىزدەگى ەتنوسارالىق قاتىناس تىلىنە اينالدىرۋعا قاتىستى باعىتىنان اينىماي, ءوز ارناسىمەن تۇراقتى تۇردە جالعاسا بەرەدى. اسسامبلەيا سەسسياسىندا پرەزيدەنت وسىنى تاعى دا انىق ايتتى. جالپى, قازاق ءتىلىنىڭ بولاشاعىنا قاتىستى پەسسيميستىك ويدان ارىلاتىن ۋاقىت جەتتى. مەن مۇنى بۇرىن دا ايتقانمىن, تاعى دا قايتالاعىم كەلەدى. كەرىسىنشە, قازاق ءتىلىنىڭ قوعامداعى ءرولى جىل وتكەن سايىن ارتىپ كەلەدى. ەڭ باستىسى, قازاق ءتىلى – جاستاردىڭ تىلىنە اينالدى. جاس عالىمدار, ونەرپازدار, كاسىپكەرلەر انا ءتىلىمىزدى كەڭىنەن قولدانىپ, ءوز باعىتتارىندا بارىنشا دامىتىپ جاتىر. دەمەك «قازاق ءتىلىنىڭ بولاشاعى جوق» دەپ ايتۋ ەشقانداي قيسىنعا كەلمەيدى», دەپ جازدى قارين Facebook-تەگى پاراقشاسىندا.

ول بۇل جەردە مىنا ءبىر نارسەنى ءتۇسىنىپ الۋىمىز كەرەكتىگىن, مەملەكەتتىك ءتىلدىڭ مارتەبەسى «ۇر دا جىق» ادىسپەن وسپەيتىنىن ناقتىلايدى.

«قازاق ءتىلىن قالقان ەتىپ پوپۋليستىك ارەكەتپەن اينالىسۋعا بولمايدى. ناعىز تىلگە جاناشىر ادام بۇلاي جاسامايدى. جانە قازىرگىدەي الماعايىپ زاماندا مۇنداي ارەكەتتەر ەلدەگى جاعدايعا زيانىن تيگىزۋى مۇمكىن. مەملەكەتتىك ءتىلدىڭ مارتەبەسىن ارتتىرۋ ناقتى جوسپارمەن, جۇيەلى جۇمىسپەن اتقارىلادى. سوندىقتان تۋعان ءتىلىمىزدىڭ تامىرىن تەرەڭدەتۋ ءىسىن الداعى ۋاقىتتا دا اقىل-پاراساتپەن اتقارۋعا ءتيىسپىز.ءسوز سوڭىندا مىنا دۇنيەنى ايتقىم كەلەدى. بۇگىندە ەلىمىزدە تەك قازاق تىلىنە قاتىستى عانا ەمەس, جالپى ۇلتتىق بىرەگەيلىكتى, ۇلتتىق بولمىسىمىزدى دارىپتەيتىن اۋقىمدى باستامالار قولعا الىنىپ, جۇزەگە اسىرىلۋدا. ۇلتتىق مەرەكەمىز ناۋرىز جاڭاشا سيپات الىپ, وزگەشە اتالىپ جاتىر. «ۇلتتىق كيىم كۇنىن» قوعام وتە جىلى قابىلدادى. بيىل العاش رەت وتكەن «ۇلتتىق كىتاپ كۇنى» دە حالقىمىزعا پايدالى باستامانىڭ ءبىرى بولماق. وسىلاي ءبارى بىرتە-بىرتە رەتكە كەلەدى», دەپ ءسوزىن تۇيىندەيدى ول.

بۇعان دەيىن قر مەملەكەتتىك كەڭەسشىسى ەرلان قارين مەملەكەت باسشىسى قاسىم-جومارت توقاەۆتىڭ قحا سەسسياسىندا سويلەگەن سوزىنە توقتالا وتىرىپ, ونداعى بىرقاتار ماڭىزدى جايتتاردى باسا اتاپ كورسەتكەن بولاتىن.