Erlan Qarın: «Bılik qazaq tiline qııanat jasady» deý – bos áńgime, daýryqpa sóz

Foto:

QR Memlekettik keńesshisi Erlan Qarın áleýmettik jelide aıtylyp, qyzý talqylanyp jatqan memlekettik tildiń mártebesine qatysty óz oıymen bólisti, dep jazdy qandastar.kz

Saıasatker memlekettiń tilge qatysty ustanymy sol qalpy ekenin naqtylaıdy, dep habarlaıdy Zakon.kz.

Memlekettik keńesshi oı bólisken, kózqarasty ashyq bildirgen durys ekenin, biraq «bılik qazaq tiline qııanat jasady» deý – bos áńgime, daýryqpa sóz ekenin aıtady.

«Attanǵa salyp, aıǵaıǵa basyp, joq jerden shý shyǵaratyndaı eshteńe bolǵan joq. Memlekettiń tilge qatysty ustanymy sol qalpy. Qazaq tilin elimizdegi etnosaralyq qatynas tiline aınaldyrýǵa qatysty baǵytynan aınymaı, óz arnasymen turaqty túrde jalǵasa beredi. Assambleıa sessııasynda Prezıdent osyny taǵy da anyq aıtty. Jalpy, qazaq tiliniń bolashaǵyna qatysty pessımıstik oıdan arylatyn ýaqyt jetti. Men muny buryn da aıtqanmyn, taǵy da qaıtalaǵym keledi. Kerisinshe, qazaq tiliniń qoǵamdaǵy róli jyl ótken saıyn artyp keledi. Eń bastysy, qazaq tili – jastardyń tiline aınaldy. Jas ǵalymdar, ónerpazdar, kásipkerler ana tilimizdi keńinen qoldanyp, óz baǵyttarynda barynsha damytyp jatyr. Demek «qazaq tiliniń bolashaǵy joq» dep aıtý eshqandaı qısynǵa kelmeıdi», dep jazdy Qarın Facebook-tegi paraqshasynda.

Ol bul jerde myna bir nárseni túsinip alýymyz kerektigin, memlekettik tildiń mártebesi «ur da jyq» ádispen óspeıtinin naqtylaıdy.

«Qazaq tilin qalqan etip popýlıstik áreketpen aınalysýǵa bolmaıdy. Naǵyz tilge janashyr adam bulaı jasamaıdy. Jáne qazirgideı almaǵaıyp zamanda mundaı áreketter eldegi jaǵdaıǵa zııanyn tıgizýi múmkin. Memlekettik tildiń mártebesin arttyrý naqty josparmen, júıeli jumyspen atqarylady. Sondyqtan týǵan tilimizdiń tamyryn tereńdetý isin aldaǵy ýaqytta da aqyl-parasatpen atqarýǵa tıispiz.Sóz sońynda myna dúnıeni aıtqym keledi. Búginde elimizde tek qazaq tiline qatysty ǵana emes, jalpy ulttyq biregeılikti, ulttyq bolmysymyzdy dáripteıtin aýqymdy bastamalar qolǵa alynyp, júzege asyrylýda. Ulttyq merekemiz Naýryz jańasha sıpat alyp, ózgeshe atalyp jatyr. «Ulttyq kıim kúnin» qoǵam óte jyly qabyldady. Bıyl alǵash ret ótken «Ulttyq kitap kúni» de halqymyzǵa paıdaly bastamanyń biri bolmaq. Osylaı bári birte-birte retke keledi», dep sózin túıindeıdi ol.

Buǵan deıin QR Memlekettik keńesshisi Erlan Qarın Memleket basshysy Qasym-Jomart Toqaevtyń QHA sessııasynda sóılegen sózine toqtala otyryp, ondaǵy birqatar mańyzdy jaıttardy basa atap kórsetken bolatyn.