ەرلان قارين: قازاق ءتىلى قۇريدى دەگەن كومپلەكستەن ارىلۋ كەرەك

فوتو: اشىق دەرەككوز

مەملەكەتتىك كەڭەسشى كەشەلى بەرى ءورشىپ تۇرعان مەملەكەتتىك تىلگە قاتىستى داۋعا پىكىر ءبىلدىردى دەپ جازادى qandastar.kz 

ەرلان قاريننىڭ اتاپ وتكەنىندەي, بيلىك الەمجەلىلەردە قازاق ءتىلىنىڭ مارتەبەسىنە قاتىستى ءارتۇرلى پىكىر ايتىلىپ, قىزۋ تالقىنىڭ تاقىرىبىنا اينالعانىن كورىپ, ءبىلىپ وتىر. مەمكەڭەسشى قازاقتىلدى اۋديتوريانىڭ وسى تاراپتا وي بولىسكەنىن, كوزقاراسىن اشىق بىلدىرگەنىن قۇپتايدى. «بىراق «بيلىك قازاق تىلىنە قيانات جاسادى» دەۋ – بوس اڭگىمە, داۋرىقپا ءسوز. اتتانعا سالىپ, ايعايعا باسىپ, جوق جەردەن شۋ شىعاراتىنداي ەشتەڭە بولعان جوق.

اشكەرە تەلەگرام ارناسى جازعانداي, اسسامبلەيا سەسسياسىندا پرەزيدەنت وسىنى تاعى دا انىق ايتتى», — دەيدى ەرلان قارين. ونىڭ پايىمداۋىنشا, قازاق ءتىلىنىڭ بولاشاعىنا قاتىستى پەسسيميستىك ويدان ارىلاتىن ۋاقىت جەتتى. كەرىسىنشە, قازاق ءتىلىنىڭ قوعامداعى ءرولى جىل وتكەن سايىن ارتىپ كەلەدى. ەڭ باستىسى, قازاق ءتىلى – جاستاردىڭ تىلىنە اينالۋدا. جاس عالىمدار, ونەرپازدار, كاسىپكەرلەر انا ءتىلىمىزدى كەڭىنەن قولدانىپ, ءوز باعىتتارىندا بارىنشا دامىتىپ جاتىر. ءسوي دەگەن قارين: «دەمەك «قازاق ءتىلىنىڭ بولاشاعى جوق» دەپ ايتۋ ەشقانداي قيسىنعا كەلمەيدى. بىراق بۇل جەردە ءبىر نارسەنى ءتۇسىنۋىمىز كەرەك: مەملەكەتتىك ءتىلدىڭ مارتەبەسى «ۇر دا جىق» ادىسپەن وسپەيدى.

مەملەكەتتىك ءتىلدىڭ مارتەبەسىن ارتتىرۋ ناقتى جوسپارمەن, جۇيەلى جۇمىسپەن اتقارىلادى. سوندىقتان تۋعان ءتىلىمىزدىڭ تامىرىن تەرەڭدەتۋ ءىسىن الداعى ۋاقىتتا دا اقىل-پاراساتپەن اتقارۋعا ءتيىسپىز», — دەيدى. مەمكەڭەسشى ءسوزىنىڭ توق ەتەرىندە, ەلىمىزدە ۇلتتىق بىرەگەيلىكتى دارىپتەيتىن اۋقىمدى باستامالار قولعا الىنىپ جاتقانىن تىلگە تيەك ەتكەن ەكەن. «ۇلتتىق مەرەكەمىز ناۋرىز جاڭاشا سيپات الىپ, وزگەشە اتالىپ جاتىر. «ۇلتتىق كيىم كۇنىن» قوعام وتە جىلى قابىلدادى. بيىل العاش رەت وتكەن «ۇلتتىق كىتاپ كۇنى» دە حالقىمىزعا پايدالى باستامانىڭ ءبىرى بولماق. وسىلاي ءبارى بىرتە-بىرتە رەتكە كەلەدى», — دەيدى وسى ورايدا ەرلان قارين.