ەرلان قوشانوۆ كيبەرالاياقتاردى قالاي توقتاتۋعا بولاتىنىن ايتتى

فوتو:qaz365.kz

پارلامەنت ءماجىلىسىنىڭ توراعاسى ەرلان قوشانوۆ دەپۋتاتتارعا كيبەرالاياقتىققا قارسى زاڭ جوباسىن دايىنداۋدى تاپسىردى, دەپ حابارلايدى,  دەپ حابارلايدى qandastar.kz

ءماجىلىس توراعاسى ەرلان قوشانوۆتىڭ ايتۋىنشا, بۇگىندە الاياقتاردىڭ قوڭىراۋ شالماعان نەمەسە كۇماندى حابارلاما جىبەرمەگەن ادام كەمدە-كەم.

«بۇگىن تالقىلانعان نەگىزگى تاقىرىپ – كيبەرالاياقتىق ماسەلەسى بولدى. ول تۇسىنىكتى دە.  سوڭعى ۋاقىتتا تسيفرلىق ورتاداعى قىلمىستاردىڭ اۋقىمى دا, ودان تۋىندايتىن قاۋىپ-قاتەر دە ەداۋىر ارتىپ كەلەدى. سوندىقتان ءسوز سويلەگەن دەپۋتاتتار وتە ورىندى ماسەلە كوتەرىپ وتىر. بىراق ءبىز كىنالىنى عانا ىزدەمەي, ماسەلەنىڭ شەشۋ جولىن قاراستىرۋىمىز كەرەك. قازىرگى كەزدە كيبەرالاياقتار قوڭىراۋ شالماعان نەمەسە كۇماندى حابارلاما جىبەرمەگەن ادام قالماعان شىعار. مۇنداي كەلەڭسىز ءۇردىس تەك قازاقستاندى عانا ەمەس, بۇكىل الەمدى جاۋلاپ الدى. پرەزيدەنتتىڭ بۇل ماسەلە بويىنشا ءتيىستى تاپسىرماسى بار. ەلىمىزدە بۇعان قارسى كۇرەس جۇرگىزىلىپ جاتقانىنا قاراماستان, كيبەرقىلمىستار ءالى دە تولاستاماي تۇر.    سوندىقتان بۇگىنگى كۇنى كيبەركەڭىستىكتە جاۋاپكەرشىلىكتى ودان ءارى كۇشەيتۋ ماڭىزدى. كيبەرشابۋىلداردىڭ باسىم بولىگى شەتەلدەن كەلەتىنى جانە ترانسۇلتتىق سيپاتتا بولاتىنى تۇسىنىكتى. بىراق بۇل جەردە جاۋاپكەرشىلىك وسى تىزبەكتىڭ بارلىق قاتىسۋشىسىنا بىردەي قاراستىرىلۋى كەرەك», – دەيدى ە. قوشانوۆ.

ەرلان قوشانوۆتىڭ سوزىنشە, كيبەركەڭىستىكتەگى كيبەرالاياقتىق ۇلكەن اۋقىم الىپ كەتكەن. ويتكەنى كوپتەگەن كيبەرشابۋىل شەتەلدەن ۇيىمداستىرىلىپ, ترانسۇلتتىق سيپاتقا يە. دەگەنمەن بۇل تەك قىلمىستىق توپتارعا عانا ەمەس, وسى جۇيەنىڭ بارلىق قاتىسۋشىلارىنا دا جاۋاپكەرشىلىك جۇكتەۋگە ءتيىس.

«ياعني, الاياقتىق سحەمالاردى ۇيىمداستىرۋشىلار عانا ەمەس, وعان ىقپال ەتەتىندەر دە قاتاڭ جاۋاپقا تارتىلۋعا ءتيىس. ول – ءموبيلدى وپەراتورلار, قارجى ۇيىمدارىنىڭ قىزمەتكەرلەرى, دروپپەرلەر جانە باسقا دا قاتىسۋشىلار. بۇل تۋرالى جاڭا دەپۋتاتتار ايتتى. ماسەلە بۇگىن عانا كوتەرىلىپ وتىرعان جوق. بۇعان دەيىن دە بىرنەشە مارتە ۋاكىلەتتى ورگاندارعا دەپۋتاتتىق ساۋالدار جولدانعان ەدى. وسىعان ۇقساس ماسەلەلەر بۇعان دەيىن دە شەشىمىن تاپتى عوي. ەستەرىڭىزدە بولسا, كەزىندە مال ۇرلىعى ەل اراسىندا دۇربەلەڭ تۋعىزدى», – دەيدى ول.

ءماجىلىس توراعاسى ەرلان قوشانوۆ كيبەرالاياقتىقتىڭ جولىن كەسۋ ءۇشىن قىلمىستىق جاۋاپكەرشىلىكتى بارىنشا كۇشەيتۋ قاجەت ەكەنىن دە باسا ايتتى.

«بروكونەرلەر ماسەلەسى دە ۋشىعىپ تۇرعان بولاتىن. ءبىز ارقايسىسى بويىنشا جەكەلەگەن نورمالار قابىلداپ, قىلمىستىق جاۋاپكەرشىلىكتى كۇشەيتتىك. سول ارقىلى اتالعان ماسەلەلەرگە توسقاۋىل قويدىق. قىز ۇرلاۋ دا – ۋشىققان ماسەلە. دەپۋتاتتار كوتەرىپ, ول ماسەلە بويىنشا دا زاڭدى قاتايتۋدى قاراستىرىپ جاتىرمىز. ەندى, مىنە, كيبەرالاياقتىقپەن دە كۇرەستى كۇشەيتىپ, قىلمىستىق جاۋاپكەرشىلىكتى بارىنشا قاتاڭداتۋعا ءتيىسپىز. زاڭدى كۇشەيتپەي, حالىققا قولايسىزدىق تۋعىزىپ وتىرعان الاياقتاردىڭ ارەكەتىن توقتاتۋ مۇمكىن ەمەس. سوندىقتان ءتيىستى كوميتەتكە شۇعىل تۇردە ءتيىستى زاڭ جوباسىن دايىنداۋدى تاپسىرامىن. وعان جاڭا باستاما كوتەرگەن دەپۋتاتتار دا اتسالىسادى دەپ ويلايمىن», – دەدى ول.